Qirg‘izistonning bir qator hududlarida elektr energiyasi ta’minoti uzildi
Bugun, 17-iyul kuni Qirgizistonning bir qator hududlarida elektr energiyasi kutilmaganda uzilib, keng ko‘lamli uzilishlar yuz berdi. Bu haqda Zamin.uz xabar berdi.
Buning oqibatida poytaxt Bishkek shahri hamda mamlakatning bir nechta viloyatlarida minglab aholi vaqtincha elektr ta’minotisiz qoldi. Mahalliy nashrlarning xabar berishicha, ushbu holat mamlakat ijtimoiy hayotiga sezilarli darajada ta’sir ko‘rsatgan.
Ma’lum qilinishicha, elektr ta’minotidagi uzilishlar faqat poytaxt bilan cheklanib qolmasdan, Chuy, Issiqko‘l, Norin va boshqa bir qator hududlarni ham qamrab olgan. Elektr energiyasining o‘chishi sababli ayrim tumanlarda sovuq va issiq suv ta’minoti ham vaqtincha to‘xtab qolgan.
Shuningdek, ko‘chalarda svetoforlar ishlamay qolgani sababli transport harakatida qiyinchiliklar yuzaga kelgan. Mobil aloqa va internet xizmatlarida ham sezilarli uzilishlar kuzatilgan, ko‘p qavatli uylardagi liftlar faoliyati to‘xtab qolgan.
Qirgiziston milliy elektr tarmog‘i aksiyadorlik jamiyati vakillari bergan ma’lumotga ko‘ra, hodisaga 220 kilovoltli ikkita yuqori kuchlanishli elektr uzatish tarmog‘ida yuz bergan avariya sabab bo‘lgan. Xususan, Qorabolta va Glavnaya hamda Glavnaya va Shu yo‘nalishlaridagi elektr uzatish liniyalari favqulodda holat tufayli o‘chib qolgan.
Bu esa butun tizim bo‘ylab zanjirli reaksiyani keltirib chiqargan. Natijada elektr tizimida ortiqcha yuklamani avtomatik tarzda kamaytirish mexanizmi ishga tushgan va xavfsizlik chorasi sifatida mamlakatning turli hududlarida elektr ta’minoti uzilgan.
Hozirgi vaqtda soha mutaxassislari elektr energiyasini bosqichma-bosqich tiklash va iste’molchilarga yetkazib berish ishlarini olib bormoqda. Mazkur avariya sabablari va tizimdagi nosozliklar yuzasidan maxsus texnik tekshiruv ishlari davom ettirilmoqda.
Mutasaddilar yaqin soatlar ichida energiya tizimi to‘liq barqarorlashishini ma’lum qilgan.
