Tramp yuk mashinasi haydovchilari o‘rniga harbiy faxriylarni jalb qiladi
Amerika Qo‘shma Shtatlari prezidenti Donald Tramp mamlakat yuk tashish sohasida faoliyat yuritayotgan hujjatsiz xorijlik haydovchilar o‘rnini amerikalik harbiy faxriylar egallashini ma’lum qildi. Bu haqda Zamin.uz xabar berdi.
Davlat rahbarining ta’kidlashicha, yangi ma’muriyat ushbu yo‘nalishda maxsus tartiblarni joriy etishni rejalashtirmoqda. Rejaga ko‘ra, AQSH armiyasida og‘ir harbiy texnikalarni boshqargan faxriylarni yuk mashinasi haydovchisi sifatida tayyorlash va ularga tijorat haydovchilik guvohnomasini olish jarayonini sezilarli darajada soddalashtirish ko‘zda tutilgan.
Donald Tramp o‘z chiqishida faxriylarga zarur ko‘nikmalar berilishini va ular noqonuniy ishlayotgan chet ellik haydovchilarning o‘rnini to‘liq egallashini alohida qayd etdi. So‘nggi oylarda AQSH hukumati yuk mashinasi haydovchilari uchun qo‘yiladigan talablarni yanada kuchaytirishga kirishdi.
Xususan, mamlakat Transport vazirligi ingliz tilini bilish darajasini qat’iy nazorat qilish hamda xorijliklarga berilgan litsenziyalarni qayta ko‘rib chiqish bo‘yicha aniq topshiriqlar olgan. Prezident yuk mashinalari ishtirokida sodir bo‘layotgan yo‘l-transport hodisalarida muhojir haydovchilarni tanqid qildi.
Garchi bu da’volarni tasdiqlaydigan keng ko‘lamli ilmiy tadqiqotlar hozircha taqdim etilmagan bo‘lsa-da, ushbu bayonotlar yaqinda yuz bergan fojiali voqeadan so‘ng yanada avj oldi. Joriy yilning iyul oyida O‘zbekiston fuqarosi Behzod Asrorov boshqaruvidagi og‘ir yuk mashinasi yengil avtomobil bilan to‘qnashib ketgan va oqibatda 21 yoshli sportchi halok bo‘lgan edi.
Tergov xulosalariga ko‘ra, haydovchi hodisadan so‘ng videoregistrator qurilmasini yashirishga uringan va dalillarni yo‘q qilishda ayblanmoqda. Ma’lum bo‘lishicha, Asrorov AQSHga grin-karta dasturi orqali kelgan va tegishli litsenziyaga ega bo‘lgan, biroq ingliz tilini bilmagani sababli politsiya bilan faqat tarjimon dasturlar orqali muloqot qilgan.
Hozirda mazkur holat yuzasidan tergov harakatlari davom ettirilmoqda va ekspertiza natijalariga ko‘ra qo‘shimcha ayblovlar e’lon qilinishi kutilmoqda.
