Amerikalik millioner Brayan Jonsonda davolab bo‘lmaydigan og‘ir xastalik aniqlandi
Qarish jarayonini toxtatish va yoshlikni saqlab qolish borasidagi tajribalari bilan dunyoga tanilgan amerikalik tadbirkor Brayan Jonson o‘zida og‘ir xastalik aniqlanganini ma’lum qildi. Bu haqda Zamin.uz xabar berdi.
Millionerning so‘zlariga ko‘ra, shifokorlar unga autoimmun gastrit tashxisini qo‘yishgan. Bu kasallik inson immun tizimining o‘z oshqozon hujayralariga hujum qilishi bilan tavsiflanadi va hozirgi vaqtda tibbiyotda to‘liq davolab bo‘lmaydigan xastaliklar sirasiga kiradi.
Tadbirkor ushbu holat haqida ijtimoiy tarmoqlardagi sahifalarida batafsil to‘xtalib o‘tdi. Ma’lum bo‘lishicha, kasallik oshqozon shilliq qavatida kislota ishlab chiqaruvchi hujayralarning yemirilishiga sabab bo‘ladi.
Jonsonning ta’kidlashicha, bunday xastalik aholining juda kichik qismida uchraydi, biroq ko‘p hollarda u hech qanday alomatsiz kechishi sababli aniqlanmay qolib ketadi. Mazkur tashxis tadbirkorga joriy yilning bahor oylarida qo‘yilgan bo‘lib, u kasallikning ildizlarini yoshlikdagi nosog‘lom turmush tarzi bilan bog‘lamoqda.
Brayan Jonsonning fikricha, yoshligida muntazam ravishda tez tayyorlanadigan taomlar va shirin gazli ichimliklarni iste’mol qilgani, shuningdek, tadbirkorlik faoliyati davomidagi kuchli ruhiy siqilishlar sog‘lig‘iga salbiy ta’sir ko‘rsatgan. Bundan tashqari, u yigirma bir yoshida qalqonsimon bez bilan bog‘liq muammolarga duch kelganini va aynan shu holat yillar o‘tib oshqozon xastaligiga zamin yaratgan bo‘lishi mumkinligini aytib o‘tdi.
Shifokorlar o‘n yil avval paydo bo‘lgan dastlabki belgilarni o‘z vaqtida to‘g‘ri baholay olishmagan. Mutaxassislarning ogohlantirishicha, ushbu kasallik nazorat qilinmasa, organizmda muhim vitaminlar tanqisligi yuzaga keladi, xotira pasayadi va hatto saraton xavfi ortadi.
Hozircha tibbiyot faqat kasallik asoratlarini kamaytirishga qodir. Shunga qaramay, har yili o‘z salomatligi uchun ikki million dollardan ortiq mablag‘ sarflaydigan Jonson taslim bo‘lmoqchi emas.
U zamonaviy texnologiyalar va sun’iy intellekt yordamida ushbu xastalikni yengish mumkinligiga ishonch bildirdi. Hozirda uning holatini o‘ttizdan ortiq malakali mutaxassislar doimiy ravishda kuzatib bormoqda.
