Tramp Xitoyni AQSh saylovlariga aralashganlikda ayblab bayonot berdi
Amerika Qo‘shma Shtatlari Prezidenti Donald Tramp xalqqa qilgan favqulodda murojaati davomida mamlakat saylov tizimidagi jiddiy kamchiliklar haqida to‘xtalib o‘tdi. Bu haqda Zamin.uz xabar berdi.
Davlat rahbari shu vaqtga qadar maxfiy saqlab kelingan razvedka ma’lumotlarini jamoatchilik e’tiboriga havola qildi. Uning ta’kidlashicha, Pekin ma’muriyati 2020-yilgi prezidentlik saylovlari natijalariga ta’sir ko‘rsatish maqsadida Amerika tarixidagi eng yirik kiberamaliyotlardan birini amalga oshirgan bo‘lishi mumkin.
Oq uydan turib uzatilgan 25 daqiqalik jonli efirda Tramp tomonidan ilgari surilgan shov-shuvli da’volar dunyo hamjamiyatining diqqat markazida turibdi. Prezident o‘z chiqishida Xitoy Xalq Respublikasining saylov jarayonlariga ehtimoliy aralashuviga oid bir qator dalillarni ochiqladi.
Unga ko‘ra, xorijiy kuchlar 220 millionga yaqin amerikalik saylovchining shaxsiy ma’lumotlarini, jumladan, ism-sharifi, telefon raqami va yashash manzillarini kiberhujumlar orqali qo‘lga kiritgan bo‘lishi mumkin. Shuningdek, to‘rtta shtatda AQSH fuqarosi bo‘lmagan 278 mingga yaqin kishi saylovchi sifatida noqonuniy ro‘yxatga olingani haqida ma’lumotlar berildi.
Donald Trampning fikricha, Pekinning asosiy maqsadi uning mag‘lubiyatini ta’minlash va Oq uy rahbariga qarshi tanqidiy materiallar tayyorlovchi jurnalistlarni moliyalashtirish bo‘lgan. Bunday aralashuvga Tramp ma’muriyati tomonidan Xitoyga nisbatan joriy etilgan iqtisodiy bojlar va AQSH harbiy qudratini oshirish rejalari sabab bo‘lgani aytilmoqda.
Donald Tramp ushbu maxfiy ma’lumotlar nima sababdan uzoq vaqt davomida jamoatchilik va davlat rahbaridan yashirilganiga ham izoh berdi. U mazkur holatda AQSH maxsus xizmatlari tarkibidagi ayrim guruhlarni to‘g‘ridan to‘g‘ri aybladi.
Prezidentning so‘zlariga ko‘ra, mazkur idoralar Xitoyning aralashuvini qasddan yashirib, Amerika xalqini va hukumatni aldab kelgan. Shu munosabat bilan u Milliy razvedka, Adliya vazirligi va Federal qidiruv byurosi kabi qudratli tashkilotlarga ushbu holatni zudlik bilan tergov qilish bo‘yicha topshiriq berdi.
Ma’lumotlarni yashirishda ishtirok etgan barcha mas’ullar ishdan bo‘shatilishi va ularga nisbatan jinoiy ish qo‘zg‘atilishi talab qilindi. Tramp saylov tizimidagi bunday zaifliklardan boshqa raqib davlatlar ham foydalanishi mumkinligidan jiddiy ogohlantirdi.
