AQSH Eronning strategik obektlariga navbatdagi havo zarbalarini berdi
Amerika Qo‘shma Shtatlari Qurolli kuchlari Eron hududidagi bir qator strategik va infratuzilma obektlariga navbatdagi yirik harbiy zarbalarni amalga oshirdi. Bu haqda Zamin.uz xabar berdi.
Vashington ushbu hujumlar Eronning harbiy salohiyatini zaiflashtirish maqsadida uyushtirilganini ta’kidlayotgan bo‘lsa, Tehron bunga javoban mintaqadagi Amerika harbiy obektlariga qarshi zarbalar berilganini ma’lum qildi. Ikki davlat o‘rtasida urush olovini yanada alangalatib yuborgan ushbu mojaro tafsilotlari xalqaro hamjamiyat diqqat markazida turibdi.
AQSH Markaziy qo‘mondonligi tomonidan berilgan ma’lumotlarga ko‘ra, yangi havo hujumlari 16-iyul kuni boshlangan. Bu Amerika harbiylarining Eron hududiga uyushtirgan ketma-ket oltinchi tungi operatsiyasi bo‘ldi.
Harbiylar zarbalardan asosiy maqsad Eronning jangovar imkoniyatlarini cheklash ekanini aytayotgan bo‘lsa-da, Eron davlat telekanallari zarbalar nafaqat harbiy, balki fuqarolik infratuzilmasiga ham jiddiy zarar yetkazganini da’vo qilmoqda. Xususan, hujumlar natijasida Xurmuzgon viloyatidagi uchta muhim ko‘prik vayron qilingan.
Bandar-Abbos shahridagi aholi yashash hududlari ham zarbaga uchragani aytilmoqda. Energetika tizimlariga ham zarar yetgan bo‘lib, Fors ko‘rfazidagi Kish orolida joylashgan elektr podstansiyasi nishonga olingan.
Bundan tashqari, Bandar-Abbos va Eronshahr aeroportlari yaqiniga raketalar tushgan. Eng xavotirli xabarlardan biri shundaki, Erondagi yagona fuqarolik atom elektr stansiyasi joylashgan Bushehr shahri atrofida kuchli portlashlar yuz bergani qayd etildi.
Eron tomonining dastlabki ma’lumotlariga ko‘ra, ushbu hujumlar oqibatida kamida uch kishi halok bo‘lgan va o‘ndan ortiq fuqaro tan jarohati olgan. Tehron ushbu hujumlarni javobsiz qoldirmadi.
Eron Islom inqilobi muhofizlari korpusi mamlakat armiyasi bilan hamkorlikda Yaqin Sharq mintaqasida joylashgan Amerika harbiy obektlariga qarshi javob operatsiyasini boshladi. Harbiy manbalarning xabar berishicha, Eronning hujumkor dronlari Bahraynda joylashgan Sahir aviabazasiga zarba bergan.
Hujum natijasida bazadagi harbiy vertolyotlar va razvedka samolyotlari nishonga olingani aytilmoqda. Ushbu keskin to‘qnashuvlar fonida qo‘shni davlatlar ham yuqori jangovar shaylik holatiga keltirildi.
Masalan, Kuvayt armiyasi o‘z havo hujumidan mudofaa tizimlarini Eron raketalari va dronlarini urib tushirish uchun safarbar qilgan. Bahrayn rasmiylari esa mamlakat bo‘ylab xavf sirenalarini ishga tushirdi.
Ikki davlat o‘rtasidagi qisqa muddatli tinchlik jarayoni barbod bo‘lishi mintaqada keng ko‘lamli urush xavfini yuzaga keltirmoqda. Vaholanki, iyun oyi o‘rtalarida tomonlar o‘rtasida jangovar harakatlarni to‘xtatish bo‘yicha kelishuv imzolangan edi.
Hozirda vaziyat o‘ta qaltis bo‘lib, xalqaro diplomatik doiralar tomonlarni vazminlikka chaqirmoqda.
