Isroil qamoqxonalarni qo‘riqlash uchun Nil timsohlaridan foydalanmoqchi
Isroilda falastinlik mahbuslar saqlanadigan yangi qamoqxona atrofini Nil timsohlari bilan o‘rash rejasi keng jamoatchilik o‘rtasida katta muhokamalarga sabab bo‘ldi. Bu haqda Zamin.uz xabar berdi.
Ushbu maqsadni amalga oshirish uchun mamlakat hukumati mazkur hayvonlarning huquqiy maqomini o‘zgartirib, ulardan xavfsizlik tizimida foydalanish imkonini beruvchi maxsus qaror qabul qildi. Ma’lum qilinishicha, Atrof-muhit vaziri Idit Silman Nil timsohlarini davlat muhofazasiga olingan turlar ro‘yxatidan chiqarish haqidagi farmonni imzoladi.
Endilikda davlat ushbu yirtqich sudralib yuruvchilarni maxsus qo‘riqlash tizimlarida qo‘llash huquqiga ega bo‘ladi. Mazkur tashabbus Milliy xavfsizlik vaziri Itamar Ben Gvir tomonidan ilgari surilgan g‘oya asosida hayotga tatbiq etilmoqda.
Vazir bir necha oy avval falastinlik mahbuslar uchun barpo etiladigan qamoqxona atrofida timsohlar saqlanadigan xavfli hudud tashkil etishni taklif qilgan edi. Ben Gvir ushbu g‘oyani ilgari surishda Amerika Qo‘shma Shtatlaridagi muhojirlarni saqlash markazlaridan birining tajribasidan ilhomlanganini ta’kidlagan.
Vazir hatto ijtimoiy tarmoqlarda sun’iy intellekt yordamida tayyorlangan, qo‘lida timsoh yetaklab turgan suratini e’lon qilib, qamoqdan qochishga uringanlar uchun keskin ogohlantirish qoldirgan. Biroq bu g‘ayritabiiy reja ekologlar va huquqshunoslar tomonidan qattiq tanqid qilinmoqda.
Mutaxassislar timsohlardan tirik qo‘riqchi sifatida foydalanish ham hayvonlar huquqlariga, ham xavfsizlikning umumiy talablariga zid ekanini ta’kidlamoqda. Isroil Tabiat va bog‘lar boshqarmasi Nil timsohlari faqat ilmiy tadqiqotlar hamda tabiatni muhofaza qilish maqsadida saqlanishi kerakligini bildirdi.
Ekologik tashkilotlar qamoqxonalarda zamonaviy texnologik xavfsizlik vositalaridan foydalanish lozimligini, hayvonlarni bunday vazifalarga jalb etish insoniylikka to‘g‘ri kelmasligini aytmoqda. Shuningdek, soha mutaxassislari yana bir muhim jihatga e’tibor qaratdi.
Ularning fikricha, qish faslida havo harorati pasayishi bilan timsohlarning harakati va faolligi keskin susayadi. Shu sababli ular doimiy qo‘riqchilik vazifasini to‘liq bajara olmaydi va xavfsizlik tizimida bo‘shliqlar yuzaga kelishi mumkin.
Hozirda ushbu reja Isroil jamoatchiligi va xalqaro tashkilotlar o‘rtasida qizg‘in bahslarga sabab bo‘lmoqda, loyihani amalga oshirishning huquqiy va axloqiy tomonlari yuzasidan muhokamalar davom etmoqda.
