AQSH maktablarida dars jarayoniga odamsimon robotlar jalb etiladi
Amerika Qo‘shma Shtatlarining Nyu-York shtatida joylashgan Salamanka shahri markaziy maktab okrugi ta’lim sohasida ulkan qadam tashlamoqda. Bu haqda Zamin.uz xabar berdi.
Ushbu okrug mamlakatdagi ilk ta’lim muassasalaridan biri sifatida dars jarayonlariga odamsimon robotni jalb etishni rejalashtirmoqda. Maktab ma’muriyatining ma’lum qilishicha, sun’iy intellekt texnologiyasi bilan jihozlangan Salli ismli robot 2026-yilning sentyabr oyidan boshlab yuqori sinf o‘quvchilari uchun o‘qituvchi yordamchisi sifatida ish boshlaydi.
Qiymati 57 ming dollarni tashkil etuvchi mazkur robot Las-Vegasda faoliyat yurituvchi Realbotix korporatsiyasi bilan hamkorlikda amalga oshirilayotgan tajriba loyihasi doirasida maktabga olib kelinmoqda. Salli tashqi ko‘rinishidan insonga juda yaqin bo‘lib, u qo‘ng‘ir sochli va maxsus lateks teriga ega.
Robot o‘z qo‘llari hamda barmoqlarini erkin harakatlantira oladi, biroq oyoqlari harakatsiz bo‘lgani sababli sinf bo‘ylab mustaqil yura olmaydi. Maktab okrugi rahbari doktor Mark Bilerning ta’kidlashicha, ushbu loyiha nafaqat hayajonli yangilik, balki katta mas’uliyat hamdir.
Uning fikricha, ta’lim sohasidagi har qanday texnologik inqilob dastlab turli bahs va e’tirozlarga sabab bo‘lishi tabiiy hol. Ilgari ham maktablarda elektron pochta yoki internet tarmog‘ini joriy etishga qarshi chiqqanlar bo‘lgan.
Bugungi kunda esa sun’iy intellekt ta’lim tizimining ajralmas va navbatdagi bosqichiga aylanmoqda. Dastlabki bosqichda Salli faqat Salamanka o‘rta maktabining 11 va 12-sinf o‘quvchilari bilan ishlaydi.
Robot asosan dasturlash, robototexnika hamda sun’iy intellekt asoslari bo‘yicha o‘tiladigan mashg‘ulotlarda ishtirok etib, o‘qituvchilarga yaqindan ko‘maklashadi. Maktab ma’muriyati robotni o‘quvchilarga yanada yaqinlashtirish va uni begona his qilmasliklari uchun unga G‘arbiy Nyu-York hududiga xos bo‘lgan talaffuz berilishini ham ma’lum qildi.
Ushbu robot Apple kompaniyasi asoschilaridan biri Stiv Voznyak ishtirokida ishlab chiqilgan maxsus ta’lim dasturi asosida faoliyat yuritadi. Maktab rahbariyati robot hech qachon tirik o‘qituvchilar o‘rnini bosmasligini alohida uqtirib o‘tdi.
Rasmiy bayonotga ko‘ra, sun’iy intellektli qurilma faqat pedagoglar uchun qo‘shimcha o‘quv vositasi bo‘lib xizmat qiladi hamda o‘quvchilarning fanga bo‘lgan qiziqishini oshirishga xizmat qiladi. Xavfsizlik masalalariga ham alohida e’tibor qaratilgan.
Robot butunlay yopiq va oflayn tizimda ishlaydi, ya’ni u tashqi internet tarmog‘iga ulanmaydi. Salli o‘quvchilarga tayyor javoblarni bermaydi, balki yo‘naltiruvchi savollar orqali ularni mustaqil fikrlashga undaydi.
Shuningdek, u hech qanday shaxsiy ma’lumotlarni yig‘maydi, video yoki audio yozuvlarni amalga oshirmaydi, bu esa o‘quvchilarning daxlsizligini to‘liq ta’minlaydi.
