Xomanaiy AQSHni kelishuvlarni buzganlikda va ishonchni yo‘qotganlikda aybladi
Eron oliy rahbari Mujtabo Xomanaiy Amerika Qo‘shma Shtatlarini Eron bilan avval erishilgan kelishuvlarga amal qilmaganlikda va o‘z zimmasiga olgan majburiyatlarini bir necha bor buzganlikda aybladi. Bu haqda Zamin.uz xabar berdi.
Uning ta’kidlashicha, Vashingtonning bunday tutumi AQSH Prezidenti Donald Tramp imzosining xalqaro maydondagi nufuzi va ishonchliligiga jiddiy putur yetkazgan. Bu haqda Eron rahbari o‘zining ijtimoiy tarmoqdagi rasmiy sahifasida ma’lum qildi.
Xomanaiy o‘z bayonotida Vashington ma’muriyati Eron bilan tuzilgan anglashuv memorandumlarini va o‘zaro kelishuvlarni muntazam ravishda buzib kelayotganini alohida qayd etdi. Uning fikricha, bunday beqaror siyosat AQSH rahbari tomonidan imzolangan har qanday hujjatning butunlay qadrsiz va ishonchsiz ekanini yaqqol namoyon qilmoqda.
Bu holat xalqaro munosabatlarda Amerika tomoniga nisbatan ishonchning yo‘qolishiga sabab bo‘layotgani aytildi. Shuningdek, Eron oliy rahbari Amerika Qo‘shma Shtatlari manziliga keskin ogohlantirishlar bilan chiqdi.
U o‘z so‘zida Eron xalqi va mintaqadagi qarshilik kuchlari zarurat tug‘ilganda har qanday tajovuzga munosib javob qaytarishga tayyorligini bildirdi. Xomanaiyning so‘zlariga ko‘ra, agar Vashington o‘zining bosim o‘tkazish siyosatini davom ettirsa, Eron tomoni Amerikaga unutilmas va munosib saboq berish uchun barcha imkoniyatlarini ishga soladi.
Ushbu bayonot mintaqadagi siyosiy vaziyat keskinlashgan bir paytda yangradi. Eron rahbariyati AQSHning sanksiyalar va siyosiy bosimlariga qaramay, o‘z milliy manfaatlarini himoya qilishda qat’iy ekanini yana bir bor tasdiqladi.
Mazkur chiqish Eron va AQSH o‘rtasidagi ziddiyatlarning yangi bosqichga ko‘tarilganidan dalolat beradi va xalqaro hamjamiyatning diqqat markazida bo‘lib turibdi.
