Ramzan Qodirov NATO davlatlariga to'g'ridan to'g'ri zarba berishga chaqirdi
Checheniston rahbari Ramzan Qodirov Ukrainaga qurol-yarog‘ va razvedka ma’lumotlarini yetkazib berayotgan NATO davlatlariga to‘g‘ridan to‘g‘ri zarba berish masalasini ko‘rib chiqishga chaqirdi. Bu haqda Zamin.uz xabar berdi.
Uning ushbu keskin bayonoti Rossiyaning Kotovsk shahridagi Wildberries logistika markaziga dronlar hujumi uyushtirilganidan so‘ng e’lon qilindi. Qodirov G‘arb davlatlari Rossiya bilan bo‘layotgan ziddiyatda bevosita ishtirok etayotganini ta’kidladi.
Shunga qaramay, uning so‘zlari Rossiya tomonidan NATOga qarshi rasmiy harbiy harakatlar boshlanishini anglatmaydi. Checheniston rahbari o‘zining Telegram kanalida Ukrainaga harbiy ko‘mak berayotgan mamlakatlar faqat kuch tilini tushunishini qayd etdi.
U o‘z chiqishida keskin ohangda gapirib, NATOga a’zo ayrim davlatlarni Kiyevga qurol va ma’lumotlarni ochiqchasiga taqdim etishda aybladi. Qodirov Rossiya rahbariyati tomonidan tegishli buyruq berilsa, har qanday vazifani bajarishga tayyorligini bildirdi.
Uning fikricha, Ukraina ittifoqchilari faqat harbiy bosim ostidagina o‘z qarashlarini o‘zgartirishi mumkin. Mazkur bayonot Tambov viloyatining Kotovsk shahriga qilingan dronlar hujumi ortidan yangradi.
Rossiya mahalliy hokimiyatining ma’lumotlariga ko‘ra, zarba natijasida logistika markazining yetti nafar xodimi hayotdan ko‘z yumgan, yigirma nafardan ortiq kishi turli darajadagi jarohatlar olgan. Jabrlanganlar zudlik bilan shifoxonalarga yetkazilgan.
Voqea joyida qutqaruvchilar va huquqni muhofaza qilish organlari xodimlari ish olib borgan. Ukraina prezidenti Vladimir Zelenskiy Moskva va Tambov viloyatlaridagi logistika obyektlariga zarba berilganini tasdiqladi.
Uning so‘zlariga ko‘ra, ushbu markazlar dronlar ishlab chiqarish uchun zarur bo‘lgan butlovchi qismlarni yetkazib berishda foydalanilgan. Shuningdek, neft omborlari va boshqa strategik nishonlarga ham hujum qilingani aytildi.
Kiyev tomoni Kotovskdagi qurbonlar haqidagi Rossiya ma’lumotlariga hozircha rasmiy munosabat bildirmadi. Ekspertlarning ta’kidlashicha, NATO davlati hududiga to‘g‘ridan to‘g‘ri harbiy zarba berish Rossiya va alyans o‘rtasidagi vaziyatni o‘ta xavfli darajaga olib chiqishi mumkin.
Shimoliy Atlantika shartnomasining beshinchi moddasiga ko‘ra, alyansning bir a’zosiga qilingan hujum barcha a’zolarga qilingan tajovuz sifatida baholanadi. Bunday holatda har bir davlat hujumga uchragan ittifoqchisini himoya qilish uchun harbiy kuch ishlatish huquqiga ega bo‘ladi.
