Turkiyada og‘ir jarohat olgan o‘zbekistonlik fuqaro vatanga qaytarildi
Turkiyaning Bursa shahrida baxtsiz hodisaga uchrab, ogir jarohat olgan O‘zbekiston fuqarosi yurtimizga qaytarildi. Bu haqda Zamin.uz xabar berdi.
Bu haqda mamlakatimizning Istanbul shahridagi Bosh konsulxonasi rasmiy ma’lumot berdi. Olingan xabarlarga ko‘ra, hamyurtimiz Z.N.
Turkiyaga ishlash maqsadida borgan va kutilmagan hodisa tufayli yashab turgan binosining uchinchi qavatidan tushib ketgan. Mazkur falokat natijasida u turli darajadagi ogir tan jarohatlarini olgan va zudlik bilan shifoxonaga yotqizilgan.
Tibbiyot muassasasida bemorga barcha zaruriy shoshilinch yordam ko‘rsatilib, malakali shifokorlar nazorati ostida davolash muolajalari olib borildi. Ushbu ogir vaziyatda Bursa shahrida istiqomat qilayotgan vatandoshlarimiz yuksak insoniylik va hamjihatlik namunasini ko‘rsatdilar.
Ular o‘z ixtiyorlari bilan birlashib, shifoxonada navbatchilik tashkil etishdi hamda bemorning kundalik ehtiyojlarini ta’minlashda, unga g‘amxo‘rlik qilishda yaqindan ko‘maklashishdi. Fuqaroni vataniga xavfsiz qaytarish maqsadida O‘zbekistonning Istanbuldagi Bosh konsulxonasi hamda Vazirlar Mahkamasi huzuridagi Migratsiya agentligi mas’ullari hamkorlikda ish olib bordilar.
Barcha tashkiliy va huquqiy masalalar hal etilgach, jarohatlangan hamyurtimiz muvaffaqiyatli ravishda O‘zbekistonga olib kelindi. Hozirda uning salomatligini tiklash bo‘yicha tegishli choralar ko‘rilmoqda.
Davlatimizning diplomatik vakolatxonasi murakkab vaziyatda chetda turmasdan, beg‘araz yordam qo‘lini cho‘zgan Bursa shahridagi ko‘ngilli o‘zbekistonliklarga o‘z minnatdorligini izhor etdi. Shuningdek, ushbu jarayonda faol ishtirok etgan O‘zbek xotin-qizlarining huquqlarini himoya qilish jamiyati vakillarining xizmatlari alohida e’tirof etildi.
Bu kabi holatlar xorijda qiyin ahvolga tushib qolgan fuqarolarimiz davlat va jamiyat e’tiboridan chetda qolmasligini yana bir bor tasdiqlaydi.
