Saudiya Arabistoni bir yillik ko‘p martalik Umra vizasini joriy etdi
Saudiya Arabistoni Haj va Umra vazirligi ziyoratchilar uchun yanada keng qulayliklar yaratish maqsadida yangi tartibdagi ko‘p martalik Umra vizasini joriy etdi. Bu haqda Zamin.uz xabar berdi.
Mazkur viza berilgan kundan boshlab bir yil davomida o‘z kuchini saqlab qoladi. Viza egalari yil davomida Qirollik hududiga bir necha bor kirib-chiqish hamda umumiy hisobda to‘qson kungacha u yerda bo‘lish imkoniyatiga ega bo‘ladilar.
Ushbu yangilik ziyorat safarlarini rejalashtirishda moslashuvchanlikni oshirish va ziyoratchilarga ko‘rsatilayotgan raqamli xizmatlar sifatini yaxshilashga xizmat qiladi. Yangi tartibga ko‘ra, belgilangan to‘qson kunlik muddat jamlanib boruvchi tartibda hisoblanadi.
Bu shuni anglatadiki, ziyoratchi Saudiya Arabistoniga har safar tashrif buyurganida, u yerda o‘tkazgan kunlari umumiy limitdan chegirib tashlanadi. Masalan, agar fuqaro birinchi safarida o‘n kun qolsa, uning ixtiyorida yana sakson kunlik muddat qoladi.
Ushbu cheklov tugagunga qadar ziyoratchi yil davomida istalgancha safar qilishi mumkin. Faqat shuni yodda tutish kerakki, mazkur viza har yili o‘tkaziladigan Haj mavsumi davomida ikki hafta muddatga o‘z kuchini yo‘qotadi.
Yangi viza tizimidan foydalanish uchun bir qator muhim shartlar belgilangan. Birinchidan, har bir tashrifdan oldin Nusuk platformasidagi rasmiy provayderlar orqali xizmatlar paketi xarid qilinishi shart.
Bunda paketning davomiyligi vizada qolgan kunlar sonidan oshib ketmasligi lozim. Ikkinchidan, Saudiya Arabistoniga kirish uchun ziyoratchi kelishidan avval Nusuk ilovasi orqali rasmiy Umra ruxsatnomasini rasmiylashtirishi talab etiladi.
Uchinchidan, bir yillik viza ziyoratchi mamlakatdan chiqib ketishi bilan vaqtincha to‘xtatiladi va yuqoridagi shartlar qayta bajarilgach, avtomatik ravishda faollashadi. O‘zbekistonlik ziyoratchilar uchun ham bu yangilik katta imkoniyatlar eshigini ochadi.
Ma’lumot o‘rnida aytish joizki, Saudiya Arabistoni 2023-yilning avgust oyidan boshlab O‘zbekiston fuqarolari uchun onlayn viza olish tizimini yo‘lga qo‘ygan edi. Hozirgi kunda yurtdoshlarimiz sayyohlik va Umra vizalarini mustaqil ravishda internet orqali rasmiylashtirib, muqaddas qadamjolarga safar qilishlari mumkin.
Yangi joriy etilgan ko‘p martalik viza esa ziyoratni yanada oson va tartibli amalga oshirishga yordam beradi. Hozircha ushbu vizaning aniq narxi borasida rasmiy ma’lumotlar e’lon qilinmagan bo‘lsa-da, barcha jarayonlar Nusuk platformasi orqali boshqarilishi tasdiqlangan.
