Epshteyn ishidagi asosiy gumonlanuvchi Daniyel Siad Fransiyada vafot etdi
Amerikalik moliyachi Jeffri Epshteyn bilan bog‘liq jinoiy ishda asosiy shaxslardan biri sifatida ko‘rilgan modellar agenti Daniyel Siad Fransiyadagi o‘z xonadonida o‘lik holda topildi. Bu haqda One.uz xabar beradi.
Shvetsiya fuqarosi bo‘lgan 69 yoshli Siadning jasadi Kolomb shahridagi uyidan aniqlangan bo‘lib, hozirda uning o‘limi sabablari huquqni muhofaza qilish organlari tomonidan o‘rganilmoqda. Mazkur shaxs AQSH Adliya vazirligi tomonidan e’lon qilingan hujjatlarda Epshteyn uchun yosh ayollarni tanlab berganlikda gumon qilingan va uning ismi tergov materiallarida ikki ming martadan ortiq tilga olingan edi.
Daniyel Siad o‘z faoliyati davomida dunyoga mashhur modellik agentliklariga rahbarlik qilgan va yuqori doiralardagi aloqalari bilan tanilgan. U vafotidan biroz avval bergan intervyusida Jeffri Epshteyn bilan yaqin tanish bo‘lganini tan olgan, biroq barcha aloqalari faqat kasbiy doirada kechganini ta’kidlagan edi.
Siadning so‘zlariga ko‘ra, u ayrim ayollarni moliyachi bilan tanishtirgan bo‘lsa-da, bu jarayonlar modellik biznesining bir qismi bo‘lgan va u Epshteynning noqonuniy harakatlaridan mutlaqo bexabar bo‘lgan. Tergov va ayblovlar tafsiloti Epshteyn ishiga doir e’lon qilingan sud hujjatlarida Daniyel Siadning roli kutilganidan ancha kengroq ekani ma’lum bo‘lgan edi.
Tergov materiallariga ko‘ra, u nafaqat Fransiyada, balki boshqa mamlakatlarda ham yosh qizlarni moliyachining shubhali tadbirlariga jalb qilishda vositachilik qilgan. Shunisi e’tiborga loyiqki, mazkur hujjatlarda samarqandlik bir ayolning ham ismi qayd etilgan bo‘lib, u Epshteyndan moliyaviy ko‘mak olgani va uning yaqinlari bilan uchrashuvlarda qatnashgani haqida ma’lumotlar mavjud.
Siadning o‘ziga nisbatan besh nafar ayol tomonidan jinsiy zo‘ravonlik va nomusga tegish bo‘yicha rasmiy shikoyatlar tushgan edi. Marhum ushbu ayblovlarning barchasini asossiz deb atab, o‘zining pokligini isbotlashga harakat qilgan.
Uning huquqiy himoyachisi Menya Arab-Tigrinning so‘zlariga ko‘ra, Daniyel Siad bir necha bor tergovchilarga murojaat qilib, o‘zini so‘roq qilishlarini va aybsizligini isbotlashga imkon berishlarini so‘ragan. Biroq, agent o‘ziga nisbatan birorta rasmiy ayblov e’lon qilinmasidan va biror marta so‘roq qilinmasidan oldin vafot etdi.
Advokatning ta’kidlashicha, hozircha o‘limning aniq sabablarini aytishga hali erta va bu borada sud-tibbiy ekspertiza xulosasini kutish lozim. Ushbu o‘lim Epshteyn ishi bo‘yicha ko‘plab sirlarning ochilmay qolishiga sabab bo‘lishi mumkinligi aytilmoqda, chunki Siad mazkur tarmoqning eng muhim bo‘g‘inlaridan biri hisoblanar edi.
