Dunyo bo‘ylab har yili qariyb uch yuz ming inson suvda cho‘kib vafot etmoqda
Jahon sog‘liqni saqlash tashkiloti e’lon qilgan so‘nggi hisobotga ko‘ra, dunyo miqyosida suvda cho‘kish bilan bog‘liq o‘lim holatlari global muammo darajasida qolmoqda. Bu haqda One.uz xabar beradi.
Har yili sayyoramizda qariyb 300 ming nafar inson suvda cho‘kish oqibatida vafot etadi. Ayniqsa, 5 yoshdan 14 yoshgacha bo‘lgan bolalar o‘rtasida cho‘kish o‘limga sabab bo‘luvchi asosiy o‘nta omilning biridir.
Mutaxassislar iqlim o‘zgarishi, suv toshqinlari va anomal issiq harorat ushbu fojialarning ko‘payishiga bevosita ta’sir ko‘rsatayotganini ta’kidlamoqda. Iqlim o‘zgarishi va xavfning ortishi Tadqiqotlar shuni ko‘rsatadiki, havo haroratining ko‘tarilishi suvda cho‘kish xavfini sezilarli darajada oshiradi.
Buyuk Britaniya olimlari o‘tkazgan tahlillarga ko‘ra, havo harorati har bir darajaga ko‘tarilganda, cho‘kish bilan bog‘liq o‘lim holatlari 7,2 foizga ortadi. Havo harorati 25 darajadan yuqori bo‘lgan kunlarda baxtsiz hodisalar ehtimoli salqin kunlarga nisbatan besh baravar ko‘proq kuzatiladi.
Bu holat odamlarning jazirama kunlarda suv havzalariga ommaviy oqib borishi va xavfsizlik qoidalariga yetarli darajada rioya qilmasligi bilan izohlanadi. Xavfsizlikni ta’minlash choralari Jahon sog‘liqni saqlash tashkiloti 25-iyul — Butunjahon cho‘kishning oldini olish kuni munosabati bilan davlatlar va jamiyatlar uchun maxsus tavsiyalarni ishlab chiqdi.
Ushbu tavsiyalar majmuasi suv havzalari atrofida xavfsiz to‘siqlar o‘rnatish, aholini qutqaruv va birinchi yordam ko‘rsatishga o‘rgatish hamda suv transporti xavfsizligini kuchaytirish kabi muhim choralarni o‘z ichiga oladi. Shuningdek, bolalarga suzishni o‘rgatish va ularni suv yaqinida qarovsiz qoldirmaslik eng samarali profilaktika usullaridan biri sifatida ko‘rilmoqda.
Joriy yilda mazkur sana "Birgalikda — suvda xavfsizlik uchun" shiori ostida o‘tkaziladi. Mutaxassislarning fikricha, suvdagi fojialarning oldini olish faqatgina davlat idoralari, jamoat tashkilotlari va har bir fuqaroning mas’uliyatli yondashuvi orqali amalga oshishi mumkin.
Suv havzalarida xavfsizlik qoidalariga amal qilish hamda favqulodda vaziyatlarda to‘g‘ri harakatlanish ko‘nikmalarini shakllantirish inson hayotini saqlab qolishning asosiy garovidir.
