Rossiyadagi urushda qatnashgan shahrisabzlik shaxs uyida qo'lga olindi
Qashqadaryo viloyatining Shahrisabz shahrida istiqomat qiluvchi fuqaro Rossiya va Ukraina o‘rtasidagi qurolli mojaroda yollanma askar sifatida ishtirok etgani hamda davlat chegarasini noqonuniy kesib o‘tgani uchun huquqni muhofaza qilish organlari tomonidan qo‘lga olindi. Bu haqda One.uz xabar beradi.
Ushbu shaxs dastlab Rossiyada giyohvandlik vositalari savdosi bilan bog‘liq jinoyatda ayblangan bo‘lib, jinoiy javobgarlikdan qutulish va moddiy manfaatdorlik evaziga harbiy harakatlarga qo‘shilgan. Urush maydonida jarohat olib, gospitalda davolanganidan so‘ng, u Rossiya hududidan qochib, O‘zbekiston chegarasini aylanma yo‘llar orqali buzib o‘tgan va yakunda o‘z uyida qo‘lga olingan.
Urushga jalb etilish va jarohatlanish Mazkur fuqaro 2024-yilda ishlash maqsadida Rossiya Federatsiyasiga boradi. Biroq 2025-yilning mart oyida u mahalliy politsiya xodimlari tomonidan giyohvandlik moddalarini qonunga xilof ravishda muomalaga kiritishda gumonlanib ushlanadi.
Tergov jarayonida unga jinoiy javobgarlikdan ozod etilish hamda yuqori ish haqi evaziga Rossiya Qurolli Kuchlari tarkibida xizmat qilish taklif etiladi. Shaxs ushbu shartnomaga rozi bo‘lib, Ukraina hududidagi jangovar harakatlarga yuboriladi.
2025-yilning sentyabr oyida jang maydonida drondan tashlangan snaryad portlashi oqibatida u og‘ir tan jarohatlari oladi. Shundan so‘ng u Rostov shahridagi harbiy shifoxonaga joylashtiriladi va u yerda bir necha hafta davomida muolaja oladi.
Sog‘lig‘i biroz tiklangach, u harbiy xizmatdan va jinoiy javobgarlikdan butunlay qutulish maqsadida gospitaldan qochishga qaror qiladi. Chegarani noqonuniy kesib o‘tish Gospitaldan yashirincha chiqib ketgan fuqaro Rossiya hududidan chiqib, Qozog‘istonga o‘tishga muvaffaq bo‘ladi.
O‘zbekistonga qaytishda u rasmiy nazorat punktlaridan o‘tish o‘zining qo‘lga olinishiga sabab bo‘lishini anglagan holda, davlat chegarasini aylanib o‘tishni rejalashtiradi. U Qozog‘iston va O‘zbekistonni bog‘lovchi suv kanali orqali suzib o‘tib, chegaradagi sim to‘siqlarni noqonuniy ravishda kesib o‘tadi.
Hozirda mazkur holat yuzasidan huquqni muhofaza qiluvchi organlar tomonidan tergov harakatlari olib borilmoqda. Fuqaro O‘zbekiston Respublikasi Jinoyat kodeksining tegishli moddalari, jumladan, xorijiy davlatlarning harbiy tuzilmalariga yollanish hamda davlat chegarasini buzib o‘tish bo‘yicha ayblanmoqda.
Ushbu voqea xorijga ishlashga ketayotgan fuqarolarni ogohlikka va qonunlarga rioya qilishga undaydi.
