Fransiyaning Oranj shahrida ayolning xonadonidan beshta chaqaloq jasadi topildi
Fransiyaning Oranj shahrida yuz bergan mudhish voqea butun mamlakat jamoatchiligini larzaga soldi. Bu haqda One.uz xabar beradi.
Mahalliy huquq-tartibot idoralari 32 yoshli ayolning xonadonidan besh nafar chaqaloqning jasadi topilgani yuzasidan keng ko‘lamli tergov ishlarini boshladi. Mazkur holat er-xotin o‘rtasidagi oddiy oilaviy nizo ortidan fosh bo‘lgan bo‘lib, ayni paytda mutaxassislar go‘daklarning o‘limi sabablarini va voqea tafsilotlarini o‘rganmoqda.
Voqea tafsilotlariga ko‘ra, ayol xonadonida sog‘lom o‘g‘il farzandni dunyoga keltirganidan bir kun o‘tib, turmush o‘rtog‘i bilan uyda saqlanayotgan shubhali karton qutilar ustida janjallashib qolgan. Bahs vaqtida ayolning salomatligi yomonlashgani sababli u shifoxonaga yotqizilgan.
Ayol shifoxonada ekanligida uning turmush o‘rtog‘i qutilarni ochib ko‘rgan va u yerda polietilen paketlarga o‘ralgan chaqaloq qoldiqlariga duch kelgan. Erkak ushbu topilmani darhol tibbiyot muassasasiga olib borgan, shifokorlar esa o‘z navbatida politsiyaga xabar bergan.
Dastlabki tergov xulosalari Sud-tibbiy ekspertiza natijalari topilgan jasadlar haqiqatan ham besh nafar chaqaloqqa tegishli ekanini tasdiqladi. Qoldiqlar ancha vaqt davomida saqlangani sababli ularda chirish jarayonlari boshlangan.
Hozirda ekspertlar go‘daklarning qachon tug‘ilgani va ularning o‘limiga nima sabab bo‘lganini aniqlash ustida ish olib bormoqda. Mazkur holat yuzasidan ochilgan jinoiy ish doirasida bir qator murakkab tekshiruvlar tayinlangan.
Karpantra shahri prokuraturasi bergan ma’lumotga ko‘ra, gumonlanuvchining turmush o‘rtog‘i tergov jarayonida xotinining avvalgi homiladorliklari haqida hech qanday ma’lumotga ega bo‘lmaganini da’vo qilgan. Erkakning so‘zlariga ko‘ra, ayol o‘z holatini doimiy ravishda yashirib kelgan.
So‘roq ishlari yakunlangach, erkak vaqtincha qo‘yib yuborilgan, biroq u tergov nazoratida qolmoqda. Oilaning taqdiri va huquqiy choralar Hozirda 32 yoshli ayol shifoxonada shifokorlar nazorati ostida qolmoqda.
Uning salomatligi yomonligi sababli huquqni muhofaza qilish organlari xodimlari uni rasman so‘roq qilishga ulgurishmadi. Ayolning ruhiy holati va sodir bo‘lgan voqeaga aloqadorligi shifoxonadan chiqqanidan so‘ng to‘liq o‘rganiladi.
Prokuratura ushbu ishni o‘ta og‘ir jinoyatlar turkumiga kiritgan. Mazkur oilaning yana ikki nafar, ya’ni 8 va 12 yoshli farzandlari borligi ma’lum bo‘ldi.
Voqea fosh etilgach, bolalarning xavfsizligini ta’minlash va ularga ruhiy yordam ko‘rsatish maqsadida maxsus ijtimoiy xizmatlar ishga tushgan. Bolalar vaqtincha davlat himoyasiga olingan.
Fransiya politsiyasi va prokuraturasi ushbu sirli va ayanchli hodisaning barcha qirralarini ochiqlashga va’da bermoqda.
