Ispaniyada dunyodagi birinchi sakkizoyoq fermasini qurish loyihasi to'xtatildi
Ispaniyada dunyodagi birinchi tijoriy sakkizoyoq fermasini tashkil etish bo‘yicha ko‘p yillik bahslarga sabab bo‘lgan loyiha rasman to‘xtatildi. Bu haqda One.uz xabar beradi.
Nueva Pescanova kompaniyasi Kanar orollarida barpo etmoqchi bo‘lgan ushbu majmua rejasi atrof-muhitga ta’siri va huquqiy to‘siqlar tufayli bekor qilindi. Mazkur qaror ortidan dunyoning bir qator mamlakatlari va AQSHning ayrim shtatlari sakkizoyoqlarni sun’iy ravishda ko‘paytirishni qonuniy taqiqlash choralarini ko‘ra boshladi.
Loyiha ilk bor e’lon qilinganida, Las-Palmas porti hududida 65 million yevro evaziga ulkan majmua qurish va u yerda yiliga 3 ming tonna sakkizoyoq go‘shti yetishtirish rejalashtirilgan edi. Biroq besh yil davom etgan huquqiy jarayonlar va jamoatchilikning keskin e’tirozlaridan so‘ng, kompaniya ushbu tashabbusdan voz kechishga majbur bo‘ldi.
Kompaniya rahbariyati bu qarorni faqatgina biznes manfaatlari va huquqiy murakkabliklar bilan izohladi. Axloqiy va ekologik muammolar Ushbu ferma loyihasi e’lon qilingan ilk kunlardanoq hayvonlar huquqlarini himoya qiluvchi tashkilotlar va olimlarning keskin tanqidiga uchradi.
Mutaxassislar sakkizoyoqlarning o‘ta aqlli, og‘riq va stressni chuqur his qiladigan jonzotlar ekanini ta’kidlab kelishdi. Ularni tor havzalarda, sun’iy sharoitda ommaviy ravishda parvarish qilish axloqiy me’yorlarga zid ekani asosiy e’tiroz sifatida ilgari surildi.
Olimlarning fikricha, tabiatda yolg‘iz yashashga odatlangan sakkizoyoqlarni bir joyga to‘plash ularda kuchli tajovuzkorlik va o‘z turdoshini yeyish kabi salbiy holatlarni keltirib chiqaradi. Garchi loyiha mualliflari bunday fermalar yovvoyi tabiatdagi sakkizoyoqlar sonini saqlab qolishga yordam berishini ta’kidlagan bo‘lsa-da, ekologlar buni asossiz deb hisoblamoqda.
Xalqaro miqyosdagi taqiqlar Ispaniyadagi ushbu voqea butun dunyoda aks-sado berdi. Hozirgi kunda AQSHning Vashington va Kaliforniya shtatlari sakkizoyoq yetishtirishni qonun bilan taqiqlab qo‘ydi.
Shuningdek, Meksika, Chili va Ispaniyaning o‘zida ham bunday faoliyat turini butunlay man etuvchi qonun loyihalari ishlab chiqilmoqda. Mutaxassislar Ispaniya kompaniyasining chekinishini hayvonlarni himoya qilish yo‘lidagi muhim g‘alaba deb baholamoqda.
Shunga qaramay, kelajakda boshqa mamlakatlarda shunga o‘xshash tijoriy loyihalar yana paydo bo‘lishi ehtimoli saqlanib qolmoqda, bu esa xalqaro hamjamiyatdan yanada hushyor bo‘lishni talab etadi.
