Avstriya maktablarida o'n to'rt yoshgacha bo'lgan qizlarga ro'mol o'rash taqiqlandi
Avstriyada 2026-2027-o‘quv yilidan boshlab 14 yoshga to‘lmagan qizlarning maktab hududida diniy e’tiqod belgisi hisoblangan ro‘mol o‘rashi rasman taqiqlandi. Bu haqda One.uz xabar beradi.
Ushbu yangi tartib mamlakatdagi barcha davlat va xususiy ta’lim muassasalariga tegishli bo‘lib, u qizlarning ijtimoiy muhitga moslashishi hamda teng huquqliligini ta’minlash maqsadida joriy etilmoqda. Hukumat mazkur qonunni qabul qilish orqali voyaga yetmagan qizlarning o‘zligini erkin namoyon etishi va bolalik davrida turli bosimlardan xoli rivojlanishini himoya qilishni ko‘zlamoqda.
Avstriya Integratsiya vaziri Klaudiya Bauerning ta’kidlashicha, qiz bolalarning mustaqil va erkin ulg‘ayishi jamiyat barqarorligi uchun muhim ahamiyatga ega. Shu sababli, maktablarda diniy kiyimlar bilan bog‘liq cheklovlar ta’lim jarayonida o‘quvchilar o‘rtasida farqlanishning oldini olishga xizmat qiladi.
Hukumat vakillari bu chorani diniy kamsitish emas, balki bolalar huquqlarini himoya qilish va ularning dunyoviy ta’lim olish imkoniyatlarini kengaytirish deb baholamoqda. Qonunbuzarlik uchun belgilangan choralar Yangi qoidalarga rioya etilishini nazorat qilishning aniq mexanizmi ishlab chiqilgan.
Agar o‘quvchi maktabga ro‘mol o‘rab kelsa, birinchi bosqichda maktab rahbariyati bola va uning ota-onasi bilan tushuntirish suhbati o‘tkazadi. Bordiyu ushbu holat takrorlansa, jarayonga ta’lim sohasidagi mas’ul organlar hamda bolalar va yoshlarni himoya qilish xizmati vakillari jalb etiladi.
Qoidani muntazam buzgan ota-onalar yoki qonuniy vasiylarga nisbatan moliyaviy jazo choralari qo‘llanilishi ko‘zda tutilgan. Jarima miqdori 150 yevrodan boshlanib, 800 yevrogacha yetishi mumkin.
Shuni ta’kidlash lozimki, ushbu taqiq faqat maktab binosi ichidagi dars jarayonlariga taalluqlidir. Maktab hududidan tashqarida o‘tkaziladigan darslar yoki ta’lim muassasasidan tashqaridagi tadbirlarda ushbu cheklov amal qilmaydi.
Bu esa o‘quvchilarga maktabdan tashqari vaqtda o‘z diniy an’analariga amal qilish imkonini qoldiradi. Siyosiy doiralardagi bahslar Mazkur qonun loyihasi Avstriya jamiyatida va siyosiy partiyalar o‘rtasida qizg‘in muhokamalarga sabab bo‘ldi.
Ayrim huquq himoyachilari va diniy tashkilotlar ushbu qarorni musulmon qizlarning huquqlarini cheklash va konstitutsiyaviy erkinliklarga zid kelish deb hisoblamoqda. Xususan, "Yashillar" partiyasi vakillari qonunning huquqiy asoslarini shubha ostiga olib, u kelajakda sud tartibida bekor qilinishi mumkinligini aytishmoqda.
Boshqa tomondan, o‘ta o‘ngchi qarashlarga ega bo‘lgan Ozodlik partiyasi ushbu chorani yetarli emas deb hisoblab, taqiqni yanada kengaytirishni taklif qilmoqda. Ular nafaqat o‘quvchilar, balki o‘qituvchilar uchun ham maktabda ro‘mol o‘rashni taqiqlash zarurligini ilgari surmoqdalar.
Shunga qaramay, qonun 2025-yil dekabr oyida parlamentning har ikki palatasi tomonidan ma’qullangan va 2026-yilning 1-sentabridan to‘liq kuchga kirishi belgilangan.
