AQSH o'zga sayyoraliklar bilan to'qnashuv uchun maxsus reja ishlab chiqdi
Amerika Qo'shma Shtatlari maxsus xizmatlari o'zga sayyoraliklar bilan to'qnashuv sodir bo'lgan taqdirda amalga oshiriladigan maxsus harakatlar rejasini ishlab chiqdi. Bu haqda One.uz xabar beradi.
Ushbu ma'lumot AQSH Milliy razvedka direktori idorasida olimlar va maxsus xizmat vakillari o'rtasida o'tkazilgan uchrashuvdan so'ng ma'lum bo'ldi. Hukumat noma'lum uchar jism (NUJ) masalasini milliy xavfsizlik darajasida ko'rib chiqmoqda va kelajakda o'zga sayyoraliklar bilan aloqa o'rnatish jarayonida dunyoda yetakchilikni qo'lga kiritishni maqsad qilgan.
Uchrashuvda hukumat tomonidan NUJ hodisalarini o'rganish uchun tashkil etilgan maxsus ilmiy kengash a'zolari ishtirok etdi. Kengash tarkibidan Garvard universiteti astronomi Avi Lyob, immunolog Garri Nolan va psixolog Jennis Vilhauer kabi nufuzli mutaxassislar joy olgan.
Muloqot yakunlari bo'yicha doktor Vilhauer onlayn platformada AQSH hukumatining kutilmagan tashriflarga nisbatan tayyorgarligi haqida ma'lumot berdi. Harakatlar rejasining mohiyati Mutaxassisning ta'kidlashicha, bunday rejaning mavjudligi Vashington o'zga sayyoraliklar borligini rasman tan olganini anglatmaydi.
Shuningdek, bu yaqin orada shov-shuvli bayonotlar berilishidan ham dalolat bermaydi. Biroq AQSH ma'muriyati bunday ehtimolni o'ta jiddiy qabul qilmoqda.
Psixologning fikricha, davlat darajasida tayyorgarlik ko'rilayotganining o'ziyoq vaziyat naqadar ahamiyatli ekanini ko'rsatadi. O'zga sayyoraliklar bilan ilk muloqot insoniyat sivilizatsiyasi uchun kutilmagan va jiddiy oqibatlarni keltirib chiqarishi mumkin.
Shu sababli favqulodda vaziyat yuzaga kelganda davlat idoralari qanday yo'l tutishi, axborot oqimini qanday boshqarishi va xavfsizlikni qanday ta'minlashi bo'yicha aniq muvofiqlashtirilgan tizim zarur bo'ladi. Hozircha rejaning texnik tafsilotlari va maxfiy bandlari jamoatchilikka ochiqlanmagan.
Jamiyatni tayyorlash vazifalari Agar o'zga sayyoraliklar borligi tasdiqlansa, bu nafaqat harbiy yoki ilmiy, balki ijtimoiy inqirozga ham sabab bo'lishi mumkin. Vilhauerning so'zlariga ko'ra, bunday holatga jamiyatning barcha qatlamlari tayyor bo'lishi lozim.
Xususan, huquq-tartibot idoralari xodimlari, shifokorlar, o'qituvchilar va hatto diniy ulamolar ham aholi o'rtasida vahima tarqalishining oldini olish bo'yicha ko'nikmalarga ega bo'lishlari kerak. Shu bilan birga, dunyoqarashi keskin o'zgargan va ruhiy tushkunlikka tushgan fuqarolarga yordam ko'rsatuvchi maxsus markazlar tashkil etish rejalashtirilgan.
Ushbu maskanlar aholiga ishonchli ma'lumot yetkazish va kutilmagan yangilikdan so'ng yuzaga kelishi mumkin bo'lgan ijtimoiy sarosimani bartaraf etishga xizmat qiladi. AQSH hukumati bu masalada uzoq muddatli strategiyani shakllantirishni asosiy vazifa deb bilmoqda.
