AQSH Kanadaga qarshi keskin savdo cheklovlari va bojlar joriy etdi

Amerika Qo‘shma Shtatlari va Kanada o‘rtasidagi savdo munosabatlari misli ko‘rilmagan darajada keskinlashdi. Bu haqda One.uz xabar beradi.

AQSH Prezidenti Donald Tramp tomonidan imzolangan yangi farmonlarga ko‘ra, qo‘shni davlatdan keltiriladigan mototsikllar, spirtli va alkogolsiz ichimliklar hamda qator ozi-ovqat xomashyolarini mamlakatga olib kirish to‘liq taqiqlandi. Shuningdek, 15-sentabrdan boshlab Kanadaning ko‘plab sanoat va iste’mol tovarlari uchun 50 foizlik boj stavkalari joriy etilishi hamda Kanada kompaniyalarining AQSH davlat xaridlari tizimidagi ishtiroki butunlay to‘xtatilishi belgilandi.

Ushbu choralar ikki davlat o‘rtasidagi iqtisodiy aloqalarni sovuqlashtirib, o‘zaro savdo urushining yangi bosqichini boshlab berdi. Taqiq ostiga tushgan mahsulotlar va cheklovlar Oq uy tomonidan e’lon qilingan rasmiy hujjatga asosan, AQSH bozori Kanada iqtisodiyotining bir necha muhim yo‘nalishlari uchun yopilmoqda.

Xususan, dvigatel hajmi 800 kub santimetrdan yuqori bo‘lgan mototsikllar va mopedlarni olib kirishga to‘liq cheklov qo‘yildi. Ichimliklar sohasida esa nafaqat spirtli mahsulotlar va vinolar, balki alkogolsiz pivo hamda olma sidri ham embargo ro‘yxatidan joy oldi.

Oziq-ovqat sanoati uchun zarur bo‘lgan sut zardobi va shakar qamishidan olinadigan xomashyolar ham endilikda AQSH chegarasidan o‘tkazilmaydi. Sanoat mahsulotlari uchun belgilangan 50 foizlik bojlar pishloq, po‘lat, alyuminiy, qog‘oz, mebel va yoritish uskunalarini qamrab oladi.

Shu bilan birga, rasmiy Vashington Kanada yengil va yuk avtomobillariga nisbatan ham xuddi shunday yuqori bojlar joriy etish masalasini ko‘rib chiqmoqda. Oq uy vakillarining ta’kidlashicha, ushbu keskin qadamlar Kanada tomonidan Amerika eksportiga nisbatan qo‘llanilgan asossiz cheklovlarga munosib javob hisoblanadi.

Iqtisodiy zarba va o‘zaro choralar ko‘lami Ikki yirik iqtisodiy hamkor o‘rtasidagi ziddiyat muzokaralar natija bermaganidan so‘ng yanada chuqurlashdi. AQSH ma’muriyati Kanadani yillik qiymati 50 milliard dollardan ortiq bo‘lgan davlat xaridlari tizimidan chiqarib tashlash orqali qo‘shni davlat budjetiga jiddiy zarba berishni ko‘zlamoqda.

Bu qaror Kanada korxonalarining Amerika bozoridagi yirik davlat buyurtmalarida ishtirok etish imkoniyatini yo‘qqa chiqaradi. O‘z navbatida, Kanada hukumati ham jim turgani yo‘q.

Rasmiy Ottava AQSHdan keladigan taxminan 20 milliard dollarlik mahsulotlarga nisbatan o‘z javob bojlarini joriy etdi. Ushbu ro‘yxatdan 629 turdagi tovarlar, jumladan, maishiy texnika, elektronika va metall mahsulotlari o‘rin olgan.

Mutaxassislarning fikricha, bunday o‘zaro iqtisodiy bosimlar nafaqat ikki davlat, balki butun Shimoliy Amerika mintaqasidagi narx-navo barqarorligiga va yetkazib berish zanjirlariga salbiy ta’sir ko‘rsatishi mumkin. Hozircha tomonlar murosaga kelish niyatida emasligini bildirmoqda.