BRIKS sammitida milliy valyutalarda hisob-kitob qilish bo'yicha kelishuvga erishildi
Hindiston poytaxti Nyu-Dehli shahridagi Bharat Mandapam markazida o‘tkazilgan BRIKS birlashmasining navbatdagi sammiti yakunlari bo‘yicha 140 banddan iborat keng qamrovli deklaratsiya qabul qilindi. Bu haqda One.uz xabar beradi.
Ushbu hujjatda a’zo davlatlarning iqtisodiy hamkorlik, xalqaro xavfsizlik va global boshqaruv tizimini isloh qilish borasidagi yakdil pozitsiyasi aks etgan. Sammitning eng muhim natijalaridan biri sifatida tashkilot doirasida yagona valyuta joriy etilishi haqidagi taxminlarga rasman chek qo‘yilgani va asosiy e’tibor milliy valyutalardagi hisob-kitoblarni kengaytirishga qaratilgani e’tirof etildi.
Milliy valyutalar va to‘lov tizimlari Sammit doirasida o‘tkazilgan brifingda Hindiston Tashqi ishlar vazirligi vakillari alyans umumiy pul birligini yaratish masalasini kun tartibiga qo‘ymayotganini tasdiqladi. Buning o‘rniga, a’zo mamlakatlar o‘zaro savdo va investitsiya jarayonlarida har bir davlatning o‘z milliy valyutasidan to‘g‘ridan-to‘g‘ri foydalanish mexanizmlarini takomillashtirishga kelishib oldilar.
Bu borada xalqaro to‘lovlarni tezkor, arzon va tashqi ta’sirlardan himoyalangan holda amalga oshirish imkonini beruvchi muqobil tranzaksiya tizimlarini ishlab chiqish ustuvor vazifa etib belgilandi. Shuningdek, deklaratsiyada Yangi taraqqiyot banki orqali yirik infratuzilma loyihalarini aynan milliy valyutalarda moliyalashtirish ko‘lamini oshirish ko‘zda tutilgan.
Bu qadam global moliya tizimidagi qaramlikni kamaytirish va iqtisodiy barqarorlikni ta’minlashga xizmat qilishi kutilmoqda. Shu bilan birga, oziq-ovqat xavfsizligini mustahkamlash maqsadida BRIKS g‘alla birjasini tashkil etish tashabbusi ham ishtirokchilar tomonidan ma’qullandi.
Xalqaro institutlarni isloh qilish Hindiston hukumati rahbari Narendra Modi o‘z nutqida XX asr o‘rtalarida shakllangan xalqaro institutlar, jumladan, Birlashgan Millatlar Tashkiloti, Xalqaro valyuta jamg‘armasi va Jahon banki bugungi kunning geosiyosiy voqeligiga mos kelmayotganini ta’kidladi. Uning fikricha, rivojlanayotgan davlatlar, ya’ni Global Janub manfaatlarini to‘liq ifoda etish uchun ushbu tuzilmalarda keng qamrovli islohotlarni amalga oshirish zarur.
Deklaratsiyada Butunjahon savdo tashkilotining nizolarni ko‘rib chiquvchi organlari faoliyatini tiklash, asossiz bir tomonlama sanksiyalar va savdodagi cheklovlarga barham berish masalalari ham o‘rin olgan. Mazkur jarayonlar O‘zbekiston kabi tashqi savdoda faol davlatlar uchun ham dolzarb bo‘lib, asosiy hamkorlar bilan uchinchi tomon aralashuvisiz, to‘g‘ridan-to‘g‘ri hisob-kitob qilish va yangi logistika yo‘laklarini ochish imkonini beradi.
Kelgusi sammit 2027-yilda Xitoyning Pekin shahrida bo‘lib o‘tishi belgilandi.
