Xoqon Fidan Ukrainadagi urush global halokatga olib kelishidan ogohlantirdi
Turkiya Tashqi ishlar vaziri Xoqon Fidan Ozarbayjonga amalga oshirgan rasmiy tashrifi davomida Ukrainadagi qurolli to‘qnashuvlarning hozirgi holati bo‘yicha jiddiy ogohlantirish bilan chiqdi. Bu haqda One.uz xabar beradi.
Vazirning ta’kidlashicha, frontdagi vaziyat endi shunchaki tomonlarning imkoniyatlarini kamaytirishga qaratilgan toliqtiruvchi urush bosqichidan o‘tib, ommaviy qirib yuborish va butkul yo‘q qilish xarakteriga ega bo‘lgan urushga aylandi. Turkiya bosh diplomati harbiy harakatlar ko‘lami kengayib borayotganini qayd etib, global halokatning oldini olish hamda urushning boshqa hududlarga yoyilishiga yo‘l qo‘ymaslik uchun janglarni zudlik bilan to‘xtatish zarurligini bildirdi.
Vaziyatning keskinlashuvi va yangi xavflar Turkiya tashqi siyosat mahkamasi rahbarining Bokudan turib yo‘llagan murojaati xalqaro hamjamiyat e’tiborini tortdi. Xoqon Fidanning so‘zlariga ko‘ra, bugungi kunda harbiy zarbalar nishoniga aylanmagan xavfsiz hududning o‘zi qolmagan.
Tinch aholi orasida qurbonlar soni muttasil ortib borayotgani va infratuzilmalarning vayron etilishi vaziyatni nazoratdan chiqarib yuborishi mumkin. Vazir agar harbiy harakatlar to‘xtatilmasa, to‘qnashuv ko‘lami vaqt o‘tishi bilan yanada kengayib, qo‘shni davlatlar va butun mintaqa xavfsizligiga tahdid solishini alohida uqtirdi.
Anqara ma’muriyati bu borada o‘zining aniq pozitsiyasini namoyish etmoqda. Turkiya ham Rossiya, ham Ukraina bilan to‘g‘ridan to‘g‘ri muloqotni saqlab turgan yagona NATO davlati sifatida o‘z vositachilik missiyasini davom ettirishga tayyor.
Prezident Rajab Toyyib Erdog‘an jamoasi yangi talafotlarning oldini olish uchun barcha tomonlarni qurollarni tashlashga va muzokara stoliga qaytishga undamoqda. Ayniqsa, Qora dengiz mintaqasida xavfsizlikni ta’minlash va gumanitar yo‘laklarni qayta tiklash masalasi Turkiya tashqi siyosatining ustuvor yo‘nalishi bo‘lib qolmoqda.
Muzokaralar uchun yangi imkoniyatlar Shu bilan birga, Ukraina tomoni ham diplomatik yechimlar borasida o‘z tayyorligini bildirdi. Ukraina Tashqi ishlar vaziri Andrey Sibiga Kiyev ma’muriyati Turkiya maydonida Vladimir Zelenskiy hamda Vladimir Putin o‘rtasida to‘g‘ridan to‘g‘ri uchrashuv o‘tkazishga shay ekanini ma’lum qildi.
Bunday yuqori darajadagi muloqot urushni to‘xtatish va barqaror tinchlikka erishish uchun muhim qadam bo‘lishi kutilmoqda. Turkiya tomoni mazkur tarixiy uchrashuv uchun barcha zarur sharoitlarni yaratib berishga va xolis vositachi sifatida ishtirok etishga tayyorligini bir necha bor tasdiqlagan.
Hozirgi kunda dunyo hamjamiyati Anqaraning ushbu tashabbusi qanchalik tez amalga oshishini va ikki davlat rahbarlarining yuzma-yuz muloqoti qachon yuz berishini diqqat bilan kuzatmoqda. Zudlik bilan o‘t ochishni to‘xtatish tartibining joriy etilishi mintaqadagi gumanitar inqirozning yumshashiga xizmat qilishi shubhasizdir.
