Tojikistonning ushbu tumanida birorta ham pullik mehmonxona yo'q
Tojikistonning baland tog‘lar qo‘ynida joylashgan Ko‘histoni Mastchoh tumani bugungi moddiy dunyoda kam uchraydigan o‘ziga xos an’anasi bilan barchani hayratga solib kelmoqda. Bu haqda One.uz xabar beradi.
Ushbu hududda sayyohlar va yo‘lovchilar uchun tunash, issiq ovqat hamda dam olish xizmatlari mutlaqo bepul tashkil etilgan bo‘lib, butun bir tumanda birorta ham pullik mehmonxona yoki xostel mavjud emas. Mahalliy aholining qat’iy hayot tarziga aylangan mehmondo‘stlik tufayli, hududga qadam ranjida qilgan har qanday musofir ko‘chada qolmaydi.
Har bir xonadon sohibi yo‘lovchini o‘z yaqinidek kutib oladi va unga beminnat xizmat ko‘rsatishni o‘zining insoniy burchi deb biladi. To‘rt ming xonadon — to‘rt ming bepul qo‘nalg‘a Ko‘histoni Mastchoh tumanida yashovchi qariyb to‘rt ming oilaning har biri o‘z uyini musofirlar uchun ochiq deb e’lon qilgan.
Bu yerda rasmiy mehmonxonalarga ehtiyoj yo‘qligining sababi ham shunda. Mahalliy aholi bilan ko‘rishganingizda, ular hol-ahvol so‘rashgach, birinchi navbatda yotishga joyingiz bor-yo‘qligi bilan qiziqishadi.
Bu shunchaki vaqtinchalik saxovat emas, balki ota-bobolardan avlodlarga meros bo‘lib kelayotgan muqaddas aqidadir. Sayyohlar bu xonadonlarda istagancha tunab qolishlari va mahalliy dasturxon ne’matlaridan bahramand bo‘lishlari mumkin, buning evaziga esa hech qanday haq talab qilinmaydi.
O‘ttiz to‘qqiz yillik uzluksiz dasturxon siri Hududdagi xonadonlarning birida 1987-yildan buyon mehmonlar uchun yozilgan dasturxon yig‘ilmagan. Xonadon sohiblarining ta’kidlashicha, bu an’ana oilaviy qadriyat darajasiga ko‘tarilgan.
Dunyoning turli burchaklaridan, jumladan, Rossiya, Pokiston, Hindiston, Qirg‘iziston hamda O‘zbekistonning Toshkent va Qarshi kabi shaharlaridan kelgan yuzlab musofirlar ushbu uyda bepul mehmon bo‘lishgan. Bir kechaning o‘zida bu xonadon 60 nafardan 100 nafargacha insonni qabul qilish imkoniyatiga ega.
Uy egalari kelgan har bir mehmonga o‘z farzandlaridek g‘amxo‘rlik qilishadi. Taomlar tayyorlash, joylarni hozirlash va musofirlarning ko‘nglini olish oilaning barcha a’zolari uchun sharafli vazifa hisoblanadi.
Darvoza peshtoqlariga bitilgan qadimiy hikmatlar esa yo‘lovchilarni nasiba olmasdan o‘tib ketmaslikka chorlaydi. Bunday beg‘araz mehmondo‘stlik namunasi insoniy fazilatlar har qanday tijorat manfaatlaridan ustun ekanligini yana bir bor isbotlamoqda.
