Eronda taniqli bloger josuslikda ayblanib o'lim jazosiga hukm qilindi
Eronda "Sevda" taxallusi bilan tanilgan bloger Marziyeh Ebrohimi Shamsobodiyga nisbatan o‘lim jazosi tayinlandi. Bu haqda One.uz xabar beradi.
Bandar-Abbos shahri Inqilobiy sudi uni mamlakat Oliy rahbarini haqorat qilish, milliy xavfsizlikka qarshi targ‘ibot olib borish va dushman davlatlar foydasiga josuslik qilish kabi qator og‘ir jinoyatlarda aybdor deb topdi. Inson huquqlari tashkilotlari va xalqaro ommaviy axborot vositalarining xabar berishicha, sud hukmida blogerning faoliyati "yer yuzida buzg‘unchilik qilish" deb baholangan.
Hozirda Bandar-Abbos qamoqxonasida saqlanayotgan Shamsobodiyga qo‘yilgan asosiy ayblovlardan biri harbiy obekt yaqinidagi raketa zarbasi oqibatlarini tasvirga olgani bilan bog‘liq. Tergov xulosasiga ko‘ra, u ushbu videolarni mamlakat tashqarisida faoliyat yurituvchi fors tilidagi media nashrlariga yuborgan.
Sud blogerni nafaqat oliy jazo, balki besh yilgacha ozodlikdan mahrum etish, mol-mulkini musodara qilish hamda ijtimoiy huquqlarini cheklash bilan ham jazoladi. Blogerning hibsga olinishi va sud jarayoni Marziyeh Shamsobodiy qo‘lga olinishidan biroz avval ijtimoiy tarmoqdagi sahifasida o‘z tanlagan yo‘lidan qaytmasligi haqida ramziy ma’nodagi so‘nggi yozuvini qoldirgan edi.
U hibsga olingach, dastlabki yigirma kun davomida tashqi dunyodan uzilgan holda, yakka tartibdagi kamerada saqlangan. Huquq himoyachilarining ta’kidlashicha, tergov jarayonida blogerga nisbatan kuchli ruhiy va jismoniy bosim o‘tkazilgan.
Ushbu hukm Eron sud tizimi tomonidan siyosiy faollarga nisbatan qo‘llanilayotgan qat’iy choralar silsilasining bir qismi sifatida ko‘rilmoqda. Blogerning himoyachilari avgust oyi oxirida hukm haqida rasman xabardor qilingan bo‘lsa-da, sud jarayonining shaffofligi borasida ko‘plab e’tirozlar mavjud.
Salomatlik holati va xalqaro munosabat Arok shahrida tug‘ilib, Tehronda voyaga yetgan Shamsobodiy uzoq yillardan buyon og‘ir xastaliklar bilan kurashib keladi. Ma’lumotlarga ko‘ra, u ko‘p skleroz, psoriaz va narkolepsiya kabi surunkali kasalliklardan aziyat chekadi.
Qamoqxona sharoitida uning salomatligi keskin yomonlashgani, zaruriy tibbiy yordam ko‘rsatilmayotgani xalqaro hamjamiyatda jiddiy xavotir uyg‘otmoqda. Inson huquqlari bo‘yicha xalqaro tashkilotlar Eronda so‘nggi vaqtlarda o‘lim jazosi hukmlari ko‘payganini tanqid qilib, Shamsobodiyning ishi inson huquqlarining qo‘pol ravishda buzilishi ekanini ta’kidlamoqda.
Mazkur holat Erondagi so‘z erkinligi va fuqarolik faolligi bilan bog‘liq vaziyatning qanchalik murakkab ekanini yana bir bor ko‘rsatib berdi. Hozirda xalqaro faollar blogerning hayotini saqlab qolish va hukmni bekor qilish bo‘yicha chaqiriqlar bilan chiqmoqda.
