Milliarder Jastin San aktrisa Szin Tyanni sudga berdi

Jahon kriptovalyuta bozori va Osiyo shou-biznesi olamida kutilmagan moliyaviy janjal yuzaga keldi. Bu haqda One.uz xabar beradi.

Mashhur Tron blokcheyn tarmog‘i asoschisi va milliarder Jastin San taniqli aktrisa Szin Tyan hamda uning ota-onasini sudga berdi. Nufuzli nashrlarning xabar berishicha, 35 yoshli tadbirkor to‘y rejalari bekor bo‘lgani sababli aktrisaning oilasiga qalin puli sifatida berilgan 30 million yuan miqdoridagi mablag‘ni qaytarib berishni talab qilmoqda.

Ushbu summa taqriban 4,5 million AQSH dollariga teng bo‘lib, Xitoy an’analariga ko‘ra kelinning ota-onasiga sovg‘a sifatida taqdim etilgan edi. Jastin San va Szin Tyan o‘rtasidagi munosabatlar uzoq yillik tarixga ega ekani aytilmoqda.

Milliarder aktrisaga talabalik davridan buyon ko‘ngil qo‘yganini va unga erishish uchun katta sa’y-harakatlar qilganini ochiqladi. Ma’lum bo‘lishicha, ilk uchrashuvda aktrisaning talabi bilan butun bir kinoteatr zali ijaraga olingan.

2026-yil boshida milliarder sevgilisining qo‘lini so‘ragan va shundan so‘ng uning oilasiga rekord darajadagi mablag‘ni o‘tkazib bergan. Odatda Xitoyda bunday to‘lovlar ancha kamtarona bo‘lsa-da, San o‘z boyligiga mos ravishda astronomik summani tanlagan.

Munosabatlarning uzilishi va sud jarayoni Ziddiyatning asosiy sababi sifatida aktrisaning qo‘shimcha moliyaviy talablari ko‘rsatilmoqda. Jastin Sanning da’vosiga ko‘ra, fotihadan so‘ng Szin Tyan AQSHda surrogat onalik xizmatidan foydalanish uchun yana katta miqdorda pul so‘ragan.

Milliarder bu talabni rad etganidan keyin juftlik o‘rtasidagi munosabatlar sovuqlashgan va nikoh rejalari butunlay to‘xtatilgan. Aktrisa muloqotni to‘xtatgach, tadbirkor berilgan pullarni qaytarib olish maqsadida qonuniy choralar ko‘rishga majbur bo‘lganini ta’kidlamoqda.

Aktrisaning vakillari esa ushbu ayblovlarga nisbatan o‘z munosabatini bildirdi. Ularning ta’kidlashicha, yulduzning obro‘sidan shaxsiy manfaatlar yo‘lida foydalanishga yo‘l qo‘yilmaydi va barcha masalalar faqat sud tartibida hal etiladi.

Hozirda ushbu voqea ham kriptovalyuta hamjamiyatida, ham shou-biznes olamida keng muhokama qilinmoqda. Katta miqdordagi mablag‘ va mashhur shaxslar ishtirokidagi ushbu sud jarayoni Xitoyning an’anaviy qadriyatlari va zamonaviy moliyaviy munosabatlar o‘rtasidagi to‘qnashuv sifatida baholanmoqda.

Milliarderning kutilmagan qarorlari Jastin San o‘zining shov-shuvli xaridlari bilan avval ham e’tiborga tushgan edi. U yaqinda devorga yopishtirilgan banan ko‘rinishidagi san’at asarini 6,2 million dollarga sotib olib, ko‘pchilikni hayratda qoldirgan edi.

Biroq shaxsiy hayotidagi ushbu muammo uning faoliyatiga qanchalik ta’sir qilishi hozircha noma’lum. Ayni paytda sud organlari taqdim etilgan dalillarni o‘rganib chiqmoqda va 4,5 million dollarlik qalin pulining taqdiri yaqin oylarda hal bo‘lishi kutilmoqda.

Mazkur voqea boylik va shon-shuhrat har doim ham baxtli yakun kafolati emasligini yana bir bor ko‘rsatdi.