Britaniya sohillari yaqinida suv ostida qolgan qadimiy shahar topildi
Buyuk Britaniyaning Norfolk grafligi sohillari yaqinida g‘avvoslar guruhi suv ostida qolib ketgan qadimiy Shipden aholi punktining qoldiqlarini o‘rganishga muvaffaq bo‘ldi. Bu haqda One.uz xabar beradi.
Taxminan 700 yil avval dengiz tubiga g‘arq bo‘lgan ushbu maskan Kromer shahri yaqinidan topilgan bo‘lib, tadqiqotchilar u yerda 25 ta sun’iy inshoot qoldig‘ini aniqladi. Mutaxassislar tomonidan suratga olingan va xaritaga tushirilgan ushbu topilmalar o‘rta asrlar tarixini o‘rganishda muhim ahamiyatga ega.
Mazkur kashfiyot sohil eroziyasi va kuchli bo‘ronlar natijasida yo‘q bo‘lib ketgan qadimiy shaharchaning mavjudligini tasdiqlovchi navbatdagi dalil bo‘ldi. Dengiz tubidan topilgan ashyolar orasida chaqmoqtoshdan qurilgan devorlar, toshdan yasalgan turli konstruksiyalar va ishlov berilgan tosh bo‘laklari mavjud.
Bir necha asr davomida suv ostida yotganiga qaramay, ayrim inshootlar o‘zining dastlabki shaklini qisman saqlab qolgan. Hozircha olimlar ushbu inshootlarning aniq vazifasi borasida yakuniy to‘xtamga kelmagan.
Taxminlarga ko‘ra, bu tuzilmalar o‘sha davrda dengiz sathining ko‘tarilishidan himoyalanish uchun qurilgan to‘siqlar yoki XIV asrda barpo etilishi rejalashtirilgan kemalar to‘xtash joyi bo‘lishi mumkin. Tarixiy manbalar va afsonalar Shipden aholi punkti haqidagi ilk rasmiy ma’lumotlar 1086-yilda tuzilgan mashhur yer kadastri hujjatlarida uchraydi.
Tarixiy manbalarga ko‘ra, o‘sha davrda ushbu maskanda 117 nafar kishi istiqomat qilgan, hududda port va ikkita cherkov faoliyat yuritgan. Biroq tabiat hodisalari va dengiz to‘lqinlarining muntazam hujumi oqibatida shahar asta-sekin suv ostida qolib, butunlay g‘oyib bo‘lgan.
Mahalliy aholi orasida bugungi kungacha dengiz tubidan cherkov qo‘ng‘iroqlarining ovozi eshitilib turishi haqidagi turli afsonalar yuradi. Garchi g‘avvoslar hozircha afsonalarda aytilgan cherkov qoldiqlarini topa olmagan bo‘lsalar-da, aniqlangan boshqa inshootlar tadqiqotlar uchun yangi yo‘nalish ochib berdi.
Mutaxassislar topilgan ashyolarni tarixiy xaritalar va yozma manbalar bilan qiyoslagan holda, Shipden shahrining aniq chegaralarini belgilashga urinmoqdalar. Bu kashfiyot nafaqat arxeologiya, balki iqlim o‘zgarishi natijasida qirg‘oq chiziqlarining qanday o‘zgarganini tushunish uchun ham o‘ta muhimdir.
