Wakuku o‘yinchoqlari Labubuga kuchli raqobat yaratmoqda
Pekin — Xitoy bozorida “Labubu” o‘yinchog‘iga jiddiy raqobatchi paydo bo‘ldi. Bu haqida Zamin.uz xabar berdi.
Yangi trendga aylangan Wakuku nomli o‘yinchoq ayniqsa qizlar va yoshlar orasida katta e’tibor qozonmoqda. TikTok foydalanuvchilari bu o‘yinchoqni “budjet Labubu” deb atashmoqda, deb xabar beradi Pravilamag.ru sayti.
Wakuku personaji 2022–2023 yillarda Xitoyning Letsvan kompaniyasi tomonidan yaratilgan va 2024 yildan boshlab ommaviy savdoga chiqarilgan. Qisqa vaqt ichida bu o‘yinchoq yoshlar, xususan 2000 yildan keyin tug‘ilgan avlod vakillari orasida katta qiziqish uyg‘otdi.
Mart oyida Pekindagi Miniso Land do‘konida panda ko‘rinishidagi Wakuku taqdim etildi. Ushbu mahsulot do‘kon daromadini 90 foizga oshirishga yordam berdi.
Iyunda esa Nankindagi Miniso Space do‘konida yangi Wakuku modeli ikki soat ichida sotilib ketdi. Wakuku o‘yinchoqlari Pop Mart kompaniyasining mashhur Labubu o‘yinchoqlari kabi maxfiy qutilarda sotiladi.
Xaridor qutini ochmaguncha, ichidagi qahramon kim ekanini bilmaydi. Bu usul mijozlarda qiziqish uyg‘otadi.
Shuningdek, Wakuku o‘yinchoqlari kichik o‘lchamda bo‘lib, sumka, ryukzak yoki belbog‘ga ilib yurishga qulaydir. Bugungi kunda ular nafaqat o‘yinchoq, balki moda aksessuari sifatida ham qadrlanmoqda.
Labubu o‘yinchoqlari ko‘pincha qimmat va eksklyuziv narxlarda sotiladi. Wakuku esa arzonroq bo‘lib, bitta qutisi taxminan 85 mingdan 230 ming so‘mgacha baholanmoqda.
Shu sababli TikTok foydalanuvchilari uni “budjet variant” deb ta’riflashmoqda.
