AQSH Meksika va Yevropaga boj solig‘ini oshirdi
AQSH Prezidenti Donald Tramp 1-avgustdan boshlab Meksika va Yevropa Ittifoqidan olib kiriladigan mahsulotlarga 30 foizlik boj solig‘i joriy etilishini ma’lum qildi. Bu haqida Zamin.uz xabar berdi.
Ushbu qaror AQSHning yirik savdo hamkorlari bilan olib borilgan muzokaralar samarasiz yakunlangani sababli qabul qilindi. Mazkur bojlar AQSHning Yevropa Ittifoqi va Meksika bilan savdo aloqalariga bevosita ta’sir ko‘rsatishi mumkin.
Meksika Prezidenti Klaudiya Sheynbaum bunday tahdidga nisbatan sovuqqonlik bilan yondashishni tavsiya qildi va mamlakat suvereniteti hech qachon savdolashuv mavzusi bo‘lmasligini ta’kidladi. Yevropa Komissiyasi Prezidenti Ursula fon der Lyayen esa bojlar transatlantik iqtisodiy aloqalarga salbiy ta’sir ko‘rsatishini bildirgan hamda zarurat tug‘ilganda javob choralarini ko‘rishga tayyor ekanligini aytdi.
Shuningdek, Tramp boshqa 23 mamlakatga ham o‘xshash maktublar yuborgan bo‘lib, unda 20 foizdan 50 foizgacha boj solinishi mumkinligi haqida ogohlantirish berilgan. Ushbu davlatlar qatorida Kanada, Yaponiya va Braziliya ham mavjud.
Bu holat global savdo munosabatlarida yangi keskinliklarni yuzaga keltirishi ehtimoldan holi emas. AQSH hukumati tomonidan qo‘yilgan ushbu cheklovlar savdo sohasida yangi muhokamalarga sabab bo‘lishi kutilmoqda.
