Abbos: G‘azoda tinchlik uchun Isroil chiqishi kerak
Falastin Prezidenti Mahmud Abbos G‘azo muammosini hal etishda Isroilning okkupatsiya qilingan hududlardan to‘liq chiqishi zarurligini yana bir bor qat’iy ta’kidladi. Bu haqida Zamin.uz xabar berdi.
Bu haqda u Amman shahrida Buyuk Britaniyaning sobiq bosh vaziri Toni Bler bilan uchrashuvda ma’lum qildi. Uchrashuvda Falastindagi so‘nggi voqealar, jumladan, tinch aholiga qarshi uyushtirilayotgan zo‘ravonliklar muhokama qilindi.
Abbos o‘z nutqida zudlik bilan otashni to‘xtatish, barcha fuqarolarni ozod qilish va G‘azoga insonparvarlik yordamini yetkazish zarurligini ta’kidladi. Uning fikricha, yagona asosiy yo‘l — Isroilning butunlay hududlardan chiqishi hisoblanadi.
Shundan so‘ng G‘azo to‘liq Falastin davlatining mas’uliyatiga o‘tadi. Davlat rahbari HAMASni qurollarni rasmiy ma’muriyatga topshirishga va Falastinni ozod etish tashkiloti doirasida siyosiy jarayonlarga qo‘shilishga chaqirdi.
Avvalroq AQSH Prezidenti Donald Tramp Isroilning Qatar va Misr vositachiligida taqdim etilgan 60 kunlik otashkesim shartlarini qabul qilganini bildirgandi. HAMAS bunga ijobiy munosabat bildirdi va muzokaralarga tayyorligini e’lon qildi.
Biroq Isroil tomoni HAMASning taklifga kiritgan o‘zgartirishlarini rad etdi. Shundan keyin Isroil delegatsiyasi muzokaralarni davom ettirish maqsadida Qatar poytaxti Doxaga yo‘l oldi.
Manbalarga ko‘ra, ko‘plab masalalar bo‘yicha kelishuvga erishilgan, ammo asosiy ziddiyat Isroilning G‘azo janubidagi Rafah shahri va Moran koridorida harbiy nazoratni saqlab qolish talabidir.
