Dunyodagi eng keksa yuguruvchi Fauja Singx vafot etdi

Dunyodagi eng keksa yuguruvchi, hindistonlik Fauja Singx hayotdan ko‘z yumdi. Bu haqida Zamin.uz xabar berdi.

U 114 yoshda edi. Marafon yugurishlari orqali dunyo e’tirofiga sazovor bo‘lgan “salladagi tornado” deb atalgan Singx avtohalokat qurboniga aylandi.

Hindustan Times nashrining xabar berishicha, Singx o‘zining tug‘ilib o‘sgan qishlog‘ida yo‘lni kesib o‘tayotgan paytda noma’lum haydovchi uni urib ketgan. Aybdor shaxs voqea joyidan qochib ketgan va hozirda huquqni muhofaza qiluvchi organlar uni izlamoqda.

Jabrlanuvchi shifoxonaga yetkazilgan bo‘lsa-da, shifokorlar uning hayotini saqlab qololmagan. Fauja Singx 1911 yil 1 aprelda tug‘ilgan.

Bolaligida yurishda qiynalganiga qaramay, yoshlikda sportni hayotining ajralmas qismiga aylantirgan. U 89 yoshida Angliyada marafon yugurishlarini jiddiy boshlagan va turli xalqaro musobaqalarda qatnashib, keksa avlod uchun ilhom manbai bo‘lgan.

2013 yilda 101 yoshida 10 kilometr masofani bir soat 32 daqiqa 28 soniyada bosib o‘tgan. Keyinchalik, 2016 yilda Mumbay marafonida ishtirok etgan.

So‘nggi yillarda esa yugurishdan tanaffus olib, musobaqalarni muxlis sifatida kuzatgan. Fauja Singxning hayoti sport, sabr-toqat va ruhiy kuch namunasi bo‘lib qoladi.

Minglab insonlar uchun ilhom manbai bo‘lgan uning xotirasi doimo qalblarda saqlanadi.