Coca-Cola AQShda qamish shakariga o‘tishga tayyorlanmoqda
AQSh prezidenti Donald Trumpning so‘zlariga ko‘ra, Coca-Cola kompaniyasi AQShda sotiladigan mahsulotlarida makkajo‘xori siropi o‘rniga haqiqiy qamish shakaridan foydalanishga rozilik bildirgan. Bu haqida Zamin.uz xabar berdi.
Bu haqda BBC xabar berdi. Trump o‘zining Truth Socialdagi postida Coca-Cola bilan ichimliklardagi shakar turi haqida gaplashganini, kompaniyaning bu taklifni qabul qilganini ma’lum qilgan.
U bunday qarorni ijobiy baholab, mahsulot sifatining yaxshilanishiga ishonch bildirgan. Kompaniya vakili esa bu o‘zgarishni rasmiy tasdiqlamagan, biroq prezidentning qiziqishini qadrlashlarini va yaqin kunlarda yangiliklar bilan bo‘lishishni va’dalagan.
Hozirda AQShda Coca-Cola ichimliklari asosan makkajo‘xori siropi bilan tayyorlanadi, boshqa davlatlarda esa qamish shakaridan foydalaniladi. Kompaniya bosh direktori James Quinsey esa aprelda ichimliklardagi shakar miqdorini kamaytirish va retseptlarni yangilash ustida ishlayotganini bildirgan.
Biroq, bu qaror AQShda makkajo‘xori sanoati uchun xavf tug‘dirishi mumkin. Corn Refiners Association rahbari John Bode bu o‘zgarish minglab ish o‘rinlarining yo‘qolishiga va fermerlar daromadining kamayishiga olib kelishini aytgan.
U qamish shakarining ham sog‘liqqa foydali emasligini ta’kidlagan. Shuningdek, sog‘liqni saqlash vaziri Robert F.
Kennedy Jr va uning "Make America Healthy Again" harakati makkajo‘xori siropi, sun’iy bo‘yoqlar va boshqa zararli moddalarni mahsulotlardan chiqarishni talab qilmoqda. Eslatib o‘tamiz, Donald Trump o‘zining Diet Coke ichimligini yaxshi ko‘radi va prezidentlik davrida Oq uyda maxsus tugma o‘rnatilib, uni tez-tez ushbu ichimlik bilan ta’minlashgan.
