Yaponiya O‘zbekistondan ishchi kuchini ko‘paytirmoqchi

Yaponiya hukumati O‘zbekiston, Hindiston, Shri-Lanka hamda boshqa Janubiy va Markaziy Osiyo davlatlaridan ko‘proq mehnat migrantlarini jalb qilishni rejalashtirmoqda. Bu haqida Zamin.uz xabar berdi.

Bu haqda Kursiv.media xabar berdi. Buning asosiy sababi Janubi-Sharqiy Osiyo mamlakatlaridan, xususan Vetnam va Xitoydan kelayotgan ishchilar sonining kamayib borayotgani bilan bog‘liq.

Shu munosabat bilan yapon kompaniyasi Onodera User Run O‘zbekiston Mehnat migratsiyasi agentligi bilan hamkorlik bitimini imzoladi. Ushbu kompaniya o‘zbekistonlik yoshlarga yapon tilini o‘rgatadi va imtihondan muvaffaqiyatli o‘tganlarga Yaponiyada ish topishda yordam beradi.

Har yili taxminan 200 nafar kishi restoran va qariyalar parvarishi sohalarida ishlash uchun tayyorlanadi. Shuningdek, O‘zbekistonda Yaponiyada ishlashni istaganlar uchun uchta yapon tili o‘rganish markazi tashkil etildi.

Bu markazlar yaponiyalik talabalar va xorijlik ishchilarga yordam beruvchi kompaniya tomonidan ochilgan. Hozirda Yaponiyada atigi 346 nafar o‘zbekistonlik ishchi faoliyat yuritmoqda.

Xitoy va Vetnamdan ishchi kuchining kamayishi natijasida Yaponiyada zarur mutaxassislarni topish tobora qiyinlashmoqda. Shu bilan birga, Janubiy Koreya va Tayvan ham xorijiy ishchilarni jalb qilish borasida kuchli raqobat olib bormoqda, chunki u yerda ham ish haqlari oshmoqda.

Bu holat Yaponiyaning ishchi kuchi muammosini hal qilishda yangi yo‘llar izlashiga sabab bo‘lmoqda.