O'zbekistonda yillik inflyatsiya darajasi olti foizdan oshdi
O‘zbekiston Respublikasi Prezidenti huzuridagi Statistika agentligi ma’lumotlariga ko‘ra, joriy yilning avgust oyida mamlakatimizda iste’mol narxlari indeksi 0,2 foizga ko‘tarildi. Bu haqda One.uz xabar beradi.
Yillik inflyatsiya ko‘rsatkichi esa 6,2 foiz darajasida qayd etildi. Oy davomida oziq-ovqat mahsulotlari narxi o‘rtacha 0,4 foizga, nooziq-ovqat tovarlari 0,2 foizga, xizmat ko‘rsatish sohasidagi tariflar esa 0,1 foizga oshgan.
Hududlar kesimida eng yuqori inflyatsiya ko‘rsatkichi Toshkent shahrida kuzatilib, poytaxtda narxlar bir oyda 0,3 foizga, yillik nisbatda esa 6,8 foizga qimmatlashgan. Oziq-ovqat va kundalik ehtiyoj mollari Iste’mol savatidagi asosiy oziq-ovqat mahsulotlari narxida sezilarli o‘zgarishlar ro‘y berdi.
Xususan, sabzi narxi 9,2 foizga, piyoz 6,2 foizga va guruch 2,2 foizga qimmatlashgan. Shuningdek, kundalik ehtiyoj tovarlaridan tuxum narxi 0,8 foizga, go‘sht mahsulotlari 0,7 foizga, pomidor 1,1 foizga va bodring 1,5 foizga oshgani kuzatildi.
Sog‘liqni saqlash sohasida ham narxlar barqaror turmadi, xususan, dori vositalari avgust oyi davomida 0,2 foizga qimmatladi. Yoqilg‘i va transport xizmatlari Energiya resurslari va yoqilg‘i narxlaridagi o‘sish sur’ati yuqoriligicha qolmoqda.
Avtomobil benzini markasiga qarab bir oy ichida 6,7 foizgacha, o‘rtacha hisobda esa 1,9 foizga qimmatlagan. Yillik ko‘rsatkichda benzin narxi 20,2 foizga oshgani qayd etildi.
Suyultirilgan gaz, ya’ni propan narxi avgust oyida 5,8 foizga ko‘tarilib, o‘tgan yilning mos davriga nisbatan 41,4 foizlik o‘sishni tashkil etgan. Ushbu o‘zgarishlar transport xizmatlari narxiga ham bevosita ta’sir ko‘rsatdi: aviatsiya xizmatlari 1,7 foizga, avtomobil transportida yuk va yo‘lovchi tashish xizmatlari esa 0,6 foizga oshdi.
Avgust oyining oxirgi o‘n kunligida, o‘quv mavsumi boshlanishi arafasida turar joy ijarasi bozorida ham harakatlanish kuzatildi. Statistika ma’lumotlariga ko‘ra, oy davomida ijara haqi o‘rtacha 0,4 foizga qimmatlashgan.
Bu ko‘rsatkichlar mamlakatdagi umumiy iqtisodiy holat va mavsumiy omillarning iste’mol bozoriga ta’sirini aks ettiradi.
