O‘zbekiston Respublikasi Prezidenti Shavkat Mirziyoyev oliy ta’lim muassasalariga qabul qilish bo‘yicha davlat buyurtmasining yangi parametrlari tasdiqladi. Bu haqida Upl.uz xabar berdi.
Ushbu qaror bilan bakalavr va magistratura mutaxassisliklari uchun grantlar soni yaqqol oshirilmoqda. Bu o‘zgarishlar kelgusi to‘rt o‘quv yilini qamrab oladi.
2025/2026 o‘quv yilidan boshlab bakalavrlar uchun grantlar soni 35 ming 500 dan oshadi, magistrantlar uchun esa deyarli 10 mingta grant ajratiladi. Keyingi yillarda grantlar soni bosqichma-bosqich ko‘paytiriladi, bu esa abituriyentlar uchun qo‘shimcha imkoniyatlar yaratadi.
Davlat rahbarining farmoniga muvofiq, 2025/2026 o‘quv yili hamda undan keyingi uch yil uchun davlat buyurtmasining asosiy ko‘rsatkichlari quyidagicha belgilandi. Bakalavrlarning kunduzgi ta’lim shakli uchun grantlar soni 2025/2026 yilda 35 500 ta, 2026/2027 yilda 36 023 ta, 2027/2028 yilda 36 460 ta va 2028/2029 yilda 36 761 taga yetkaziladi.
Magistratura yo‘nalishlarida esa grantlar soni 2025/2026 yilda 9 922 ta, 2026/2027 yilda 10 191 ta, 2027/2028 yilda 10 477 ta va 2028/2029 yilda 10 784 taga ko‘paytiriladi. Oliy va o‘rta maxsus ta’lim vazirligi davlat komissiyasiga qo‘shimcha grantlar taqsimoti bo‘yicha takliflar ham taqdim etadi.
Xususan, 1 320 davlat granti xorijdagi oliy ta’lim muassasalari va ularning filiallari hamda respublika hududida faoliyat yuritayotgan nodavlat oliy ta’lim muassasalarida o‘qish uchun ajratiladi. Shuningdek, chet elda yashayotgan vatandoshlar uchun davlat oliy ta’lim muassasalarida o‘qish imkoniyatini yaratish maqsadida 30 ta davlat granti ajratilishi ko‘zda tutilgan.
Bundan tashqari, Oila va xotin-qizlar qo‘mitasi bilan hamkorlikda ayollar uchun maxsus 4 mingta davlat granti taqsimlanadi. Ushbu chora-tadbirlar mamlakatimizda ta’lim sifatini oshirish va yoshlarning bilim olish imkoniyatlarini kengaytirishga xizmat qiladi.
Davlat tomonidan taqdim etilayotgan grantlar sonining ko‘payishi oliy ta’lim tizimida raqobatni kuchaytirib, malakali kadrlar tayyorlashga ijobiy ta’sir ko‘rsatadi.
