Bandlik va kambag‘allikni qisqartirish vazirligi matbuot xizmati tomonidan ma’lum qilinishicha, videoselektor yig‘ilishi vaqtida yuzaga kelgan holat bo‘yicha tekshiruv o‘tkazildi. Bu haqida Upl.uz xabar berdi.
Ijtimoiy tarmoqlarda vazirlikning videoselektor yig‘ilishidan olingan surat tarqaldi. Yig‘ilish jarayonida bir nafar mansabdor shaxs shaxsiy kompyuteridagi veb-kamerani o‘chirishni unutib, jonli efirda xodimni tizzasiga olib o‘tirib, uni quchoqlagani ko‘rindi.
Ushbu holat yuzasidan ichki surishtiruv olib borildi va tegishli xodimlar bilan mehnat shartnomalari bekor qilindi. Ta’kidlanishicha, videoselektor yig‘ilishida ishtirok etgan erkak shaxs 2023 yil dekabrdan beri Kattaqurg‘on tuman bandlik va kambag‘allikni qisqartirish bo‘limining bir bo‘lim rahbari lavozimida ishlagan.
Ushbu holat yuzasidan vazirlik tomonidan zarur choralar ko‘rildi va bunday nojo‘ya vaziyatlarning oldini olish uchun qo‘shimcha nazorat joriy etildi. Bandlikni ta’minlash va kambag‘allikni kamaytirish sohasida o‘tkazilayotgan yig‘ilishlar va faoliyatlar shaffof va qonuniy bo‘lishi muhim hisoblanadi.
