2025 yilda test sinovlaridan muvaffaqiyatli o‘tgan abituriyentlar uchun muhim davr boshlandi. Bu haqida Upl.uz xabar berdi.
25 iyuldan 8 avgustgacha ular oliy ta’lim muassasalari va ta’lim yo‘nalishlarini tanlashlari kerak bo‘ladi. Bu jarayon uchun jami 15 kun ajratilgan.
Tanlov qilish uchun abituriyentlar my.uzbmb.uz saytiga kirib, maxsus platformada ro‘yxatdan o‘tishlari lozim. Ro‘yxatdan o‘tganidan so‘ng “Oliy va kasb-hunar ta’lim muassasalariga qabul” bo‘limiga o‘tib, keyingi bosqichda “Universitet tanlovi” bo‘limidan foydalanadilar.
Tanlov jarayoni quyidagicha tashkil etilgan. Avvalo, abituriyent o‘z ustuvor yo‘nalishlarini belgilaydi va zarur bo‘lsa, maqsadli qabulda ishtirok etishini tasdiqlaydi.
So‘ngra, topshirilgan fanlar ro‘yxati va tanlangan o‘quv tili asosida beshta oliy ta’lim muassasasi va yo‘nalishni tanlash imkoniyati beriladi. Yo‘nalishlar bir yoki bir nechta universitetlarda bo‘lishi mumkin, shuningdek, o‘quv shakli ko‘rsatilishi zarur.
Tanlovni yakuniy tasdiqlash uchun abituriyent tomonidan ko‘rsatilgan telefon raqamiga SMS-xabar yuboriladi. SMS orqali tasdiqlangach, tizim avtomatik tarzda ro‘yxatga olish varaqasini shakllantiradi.
Shuni ta’kidlash kerakki, abituriyentlar tanlovni belgilangan muddat tugaguncha o‘zgartirish huquqiga ega. O‘zgartirishlar kiritilgach, yangilangan ro‘yxatga olish varaqasini qayta yuklash talab etiladi.
Tanlov natijalari jarayon tugagach, bir hafta ichida rasmiy e’lon qilinadi.
