Ichki ishlar vazirligi matbuot xizmati ma’lum qilishicha, Farg‘ona viloyatida psixotrop dorilarni noqonuniy savdo qilgan shaxs qo‘lga olindi. Bu haqida Upl.uz xabar berdi.
2024 yil 28 iyul kuni ichki ishlar organlari tomonidan “Xavfsiz va sog‘lom mamlakat” oyligi doirasida maxsus tezkor tadbir o‘tkazildi. Tadbir davomida 1997 yilda tug‘ilgan erkak shaxs katta miqdordagi psixotrop dorilarni sotishga uringan vaqtda ushlangan.
Uning qo‘lida 1000 dona “Tropikamid” psixotrop dori vositasi topilib, uning bozor qiymati taxminan 100 million so‘mni tashkil etdi. Umuman olganda, huquqni muhofaza qiluvchi organlar tomonidan 300 million so‘mlik psixotrop dorilar musodara qilindi.
Ushbu narx qora bozor sharoitida belgilangani qayd etildi. Mazkur holat yuzasidan O‘zbekiston Respublikasi Jinoyat kodeksining “Kuchli ta’sir qiluvchi, narkotik bo‘lmagan, ularning analoglari yoki psixotrop moddalarni tayyorlash, tarqatish, reklama qilish, namoyish etish yoki bunday moddalar va zaharli moddalar noqonuniy aylanmasi” moddasi bo‘yicha jinoyat ishi qo‘zg‘atildi.
Hozirda tergov harakatlari davom etmoqda.
