Bosh prokuratura huzuridagi Departament matbuot xizmati tomonidan noqonuniy dori-darmon do‘koni aniqlangani haqida ma’lum qilindi. Bu haqida Upl.uz xabar berdi.
Yozyovon tuman bo‘limi xodimlari tomonidan o‘tkazilgan tezkor tadbir davomida MChJ "D.X."ga tegishli bo‘lgan, Yozyovon mahalla fuqarolar yig‘inida joylashgan dorixona faoliyati litsenziyasiz amalga oshirilayotgani aniqlangan. Ushbu dorixonadan jami 24 723 dona turli dori vositalari olib qo‘yilgan bo‘lib, ularning umumiy qiymati 154,3 million so‘mni tashkil etadi.
Ekspertlar xulosasiga ko‘ra, ushbu dorixonada sotilayotgan dori vositalarining to‘rtta turi O‘zbekiston hududida qo‘llanishi taqiqlangan. Mazkur holat yuzasidan O‘zbekiston Respublikasi Jinoyat kodeksining "Sifat jihatdan yomon yoki soxtalashtirilgan dori vositalarini ishlab chiqarish, sotib olish, saqlash, tashish yoki sotish, shuningdek, dorixonalar va ularning filiallarsiz dori vositalarini realizatsiya qilish, kuchli ta’sir qiluvchi moddalarni o‘z ichiga olgan dori vositalarini retsept bo‘yicha chakana savdoda tartibni buzish" moddasiga asosan jinoyat ishi qo‘zg‘atildi.
Huquqni muhofaza qiluvchi organlar tomonidan tergov harakatlari davom ettirilmoqda.
