Toshkentda 19 yoshli yigitdan 2,3 kg narkotik topildi

Toshkent shahar IIBB matbuot xizmati xabariga ko‘ra, narkotik modda savdosida gumon qilingan shaxs qo‘lga olindi. Bu haqida Upl.uz xabar berdi.

Ichki ishlar organlari xodimlari hamda Davlat xavfsizlik xizmati bilan hamkorlikda Mirzo Ulug‘bek tumanida maxsus tezkor tadbir o‘tkazildi. Tadbir davomida Toshkent viloyatining Bo’stanliq tumaniga qarashli G’azalkent shahrida yashovchi 19 yoshli fuqaro ushlangan.

Undan taxminan 200 gramm geroin topilgan. Gumonlanuvchi o‘zining ijaraga olgan yashash joyida hamda G’azalkentdagi shaxsiy uyida narkotik moddalarning saqlangani haqida tan olgan. 

Umumiy hisobda unga tegishli bo‘lgan 2,31 kilogramm narkotik modda aniqlanib, musodara qilindi. Ushbu moddalarning umumiy qiymati 1 milliard 390 million so‘mni tashkil etadi.

Mazkur holat yuzasidan O‘zbekiston Respublikasi Jinoyat kodeksining 273-moddasi, beshinchi qismi bo‘yicha jinoyat ishi qo‘zg‘atilgan. Ushbu modda noqonuniy ravishda narkotik vositalarni ishlab chiqarish, sotib olish, saqlash hamda ularni sotish maqsadida boshqa harakatlarni amalga oshirishni nazarda tutadi.

Gumonlanuvchiga nisbatan eng ko‘p 20 yilgacha ozodlikdan mahrum qilish jazosi qo‘llanilishi mumkin. Ichki ishlar organlari va xavfsizlik xizmatlari narkotik vositalarga qarshi kurashni davom ettirmoqda va bunday jinoyatlarga qarshi qattiq choralar ko‘rmoqda.