Janubiy Koreyaning markazlashtirilgan issiqlik ta’minoti korporatsiyasi KDHC yangi Toshkentda K-Heating loyihasini amalga oshirishga qiziqish bildirganini ma’lum qildi. Bu haqida Upl.uz xabar berdi.
Korporatsiya rahbari Jon Yon Ki issiqlik ta’minoti sohasidagi ilg‘or va atrof-muhitga zarar yetkazmaydigan texnologiyalarni bo‘lishishga tayyor ekanligini ta’kidladi. O‘zbekiston elchisi Alisher Abdusalomov bilan uchrashuvda KDHC prezidenti Jon Yon Ki yangi Toshkentda issiqlik ta’minoti tizimini rivojlantirishda yordam berishga tayyorligini bildirdi.
U ekologik toza K-Heating texnologiyasini joriy etishni taklif qildi hamda koreys tajribasini o‘rtoqlashishga tayyor ekanini ma’lum qildi. KDHC O‘zbekistonga mo‘ljallangan loyiha guruhini shakllantirib, mavjud issiqlik ta’minoti infratuzilmasini modernizatsiya qilish bo‘yicha maslahatlar o‘tkazdi.
Korporatsiyaning yaqin rejalarida o‘zbekistonlik mutaxassislarga mo‘ljallangan o‘quv dasturini ishga tushirish ko‘zda tutilgan. Jon Yon Ki shuningdek, koreys kompaniyalariga mamlakat energiya bozoriga kirishda elchixonaning ko‘mak berishini so‘radi.
Uchrashuv davomida O‘zbekiston elchisi KDHC boshqaruv markazi va Pangyoda joylashgan issiqlik elektr stansiyasiga tashrif buyurib, ularning faoliyati bilan yaqindan tanishdi.
