Jizzax viloyati IIB matbuot xizmati tomonidan narkotik modda saqlovchi o‘simlik yetishtirilgani aniqlangani haqida ma’lumot berildi. Bu haqida Upl.uz xabar berdi.
Ichki ishlar organlari xodimlari va Davlat xavfsizlik xizmati vakillari bilan hamkorlikda Jizzax viloyatining G‘allaorol tumanida maxsus tezkor tadbir o‘tkazildi. Tadbir davomida “T.A.S.” MChJga qarashli, Bulokboshi mahallasida joylashgan korxona hududi tekshirildi.
Tekshiruv natijasida 23 dona kannabis o‘simligi topildi. Mazkur holat bo‘yicha o‘rganish ishlari davomida ushbu narkotik modda saqlovchi o‘simliklarni ekish va parvarishlash bilan korxona qo‘riqchisi shug‘ullangani ma’lum bo‘ldi.
U 1971 yilda tug‘ilgan bo‘lib, Navoiy viloyati Qiziltepa tumanining Toshmasjid mahallasida yashaydi. Ushbu holat yuzasidan O‘zbekiston Respublikasi Jinoyat kodeksining “Ta’qiqlangan madaniy o‘simliklarni yetishtirish” moddasining birinchi qismi bo‘yicha jinoyat ishi qo‘zg‘atildi.
Gumonlanuvchiga uch yilgacha ozodlikdan mahrum qilish jazosi qo‘llanilishi mumkin.
