O‘zbekiston joriy yilda haqiqiy turizm inqilobini boshdan kechirmoqda. Bu haqida Upl.uz xabar berdi.
Bu ma’lumotlar O‘zbekiston Respublikasi Davlat statistika qo‘mitasi tomonidan taqdim etilgan. 2025-yilning birinchi yarmida mamlakatga sayohat maqsadida kelgan xorijiy fuqarolar soni 783,7 ming nafarga yetdi.
Bu ko‘rsatkich o‘tgan yilning mos davriga nisbatan 255,1 ming kishaga yoki 48,3 foizga oshganini anglatadi. Joriy yilning olti oyida O‘zbekistonga sayohat uchun kelgan xorijiy fuqarolar mamlakatlar bo‘yicha quyidagicha taqsimlandi: Rossiyadan 166,6 ming kishi, Turkmanistondan 123,0 ming kishi, Qozog‘istondan 77,7 ming kishi, Qirg‘izistondan 71,6 ming kishi, Tojikistondan 49,1 ming kishi, Xitoydan 39,1 ming kishi, Turkiyadan 29,3 ming kishi, Hindistondan 22,0 ming kishi, Italiyadan 18,6 ming kishi, Janubiy Koreyadan 14,9 ming kishi, Germaniyadan 14,7 ming kishi, AQShdan esa 13,2 ming kishi kelgan.
Shuningdek, boshqa mamlakatlardan kelgan sayyohlar soni 143,9 mingni tashkil etdi. Ushbu raqamlar O‘zbekistonning turizm salohiyatining oshib borayotganligini va xorijiy sayyohlar orasida mamlakatimizga bo‘lgan qiziqishning ortayotganini ko‘rsatadi.
Bu esa iqtisodiyotning turizm sohasida yangi imkoniyatlar paydo bo‘lishiga xizmat qilmoqda. Mamlakatimizda turizmni rivojlantirish borasida olib borilayotgan ishlar natijasida xalqaro sayyohlar oqimi sezilarli darajada ko‘paymoqda.
