Amerikalik yulduz Jennifer Lopesning Toshkentdagi kontserti nafaqat O‘zbekiston madaniy hayoti uchun muhim voqea bo‘lib, balki iqtisodiy jihatdan ham katta foyda keltirdi. Bu haqida Upl.uz xabar berdi.
Madaniyat va san’atni rivojlantirish jamg‘armasi ma’lumotlariga ko‘ra, ushbu tadbir mamlakatning jahon miqyosidagi yirik tadbirlarni o‘tkazish salohiyatini namoyish etdi. 7 avgust kuni “Milliy” (Bunyodkor) stadionida bo‘lib o‘tgan kontsert “Up All Night: Live in 2025” jahon turining bir qismi bo‘lib, O‘zbekistonda AAA darajadagi artistning ilk konserti sifatida tarixiy ahamiyatga ega bo‘ldi.
Tadbirga 31 mingdan ortiq tomoshabin tashrif buyurdi. Sotilgan 25 ming chipta ichida 67 foizini xorijiy sayyohlar sotib oldi.
Ularning soni 15 330 nafarga yetib, asosan Rossiya (9 mingga yaqin), Qozog‘iston (2,5 ming atrofida) hamda Yevropa va AQShdan kelganlar tashkil etdi. Bu esa poytaxt mehmonxonalarining bandligini 5-8 avgust kunlari oralig‘ida o‘tgan yilning shu davriga nisbatan 25,7 foizga oshirishga yordam berdi.
Sayyohlik faolligi bilan bir qatorda, kontsert shahar iqtisodiyotiga ham sezilarli ta’sir ko‘rsatib, 42,5 milliard so‘mdan ortiq soliq tushumlarini ta’minladi. Bu holat restoran va mehmonxona biznesini ham rivojlantirishga turtki bo‘ldi.
Misol uchun, 7 avgust kuni Chilonzor metro liniyasi odatdagidan 16,5 ming nafar ko‘proq yo‘lovchini tashidi. Tadbirni tashkil etishda 115 ta kompaniya ishtirok etdi, ular 18 ta ovqatlanish maydonchalarini ham o‘z ichiga olgan yuqori sifatli xizmat ko‘rsatdi.
Xavfsizlik va tartibni ta’minlash uchun 3,8 ming huquqni muhofaza qiluvchi xodim, 300 nafar ko‘ngilli hamda 500 nafar hudud tozaligiga mas’ul shaxslar faoliyat yuritdi. Madaniyat va san’atni rivojlantirish jamg‘armasi tashkilot ishining yuqori darajasini yuqori baholadi va bu tadbir oldingi yirik voqealarga nisbatan ancha tartibli va samarali o‘tgani qayd etildi.
