Toshkent viloyati IIBB Yo‘l harakati xavfsizligi boshqarmasi matbuot xizmati tomonidan ma’lum qilinishicha, psixotrop dorilarni saqlash holati aniqlangan. Bu haqida Upl.uz xabar berdi.
Yangiqo‘rg‘on tumanida o‘tkazilgan “Xavfsiz va sog‘lom mamlakat” oyligi doirasida Yo‘l harakati xavfsizligi inspektorlari tomonidan “Matiz” rusumli avtomobil to‘xtatilib, haydovchisi 1971 yilda tug‘ilgan erkak shaxs tekshiruvdan o‘tkazildi. Avtomobil salonida guvohlar ishtirokida o‘tkazilgan ko‘zdan kechirishda 8 dona qizil oq rangli “Zardeks” nomli kuchli ta’sir qiluvchi dori kapsulalari topildi.
Ushbu holat yuzasidan tegishli hujjatlar rasmiylashtirildi. Erkak shaxsga O‘zbekiston Respublikasi Jinoyat kodeksining 251-1-moddasi bo‘yicha jinoiy javobgarlik qo‘yilishi mumkin.
Mazkur modda kuchli ta’sir qiluvchi, narkotik vositalar bo‘lmagan, ularning analoglari yoki psixotrop moddalarni ishlab chiqarish, tarqatish, reklama qilish, namoyish etish yoki noqonuniy aylanmasi bilan bog‘liq jinoyatlarni nazarda tutadi. Bu holat qonuniy choralar ko‘rilishini talab qiladi.
