Ijtimoiy tarmoqlarda fuqarolar butun kun davomida Toshkent ustida aylanib yurgan samolyotga e’tibor qaratishgan. Bu haqida Upl.uz xabar berdi.
FlightRadar24 tizimi ma’lumotlariga ko‘ra, Toshkent shahrining ustida tongdan boshlab “DKZ1895” raqamli yengil motorli samolyot doimiy aylanmoqda. Ijtimoiy tarmoqlardagi foydalanuvchilar bu samolyotni poytaxtning turli hududlarida ko‘rishayotganini bildirganlar.
Ayniqsa, uning motor shovqini Mirzo-Ulug‘bek tumanida aniq eshitilmoqda, bu hududda samolyot doimiy burilishlar qilmoqda. Hozircha mas’ul tashkilotlar tomonidan rasmiy ma’lumot berilmagan.
Fuqarolar bunday samolyotning zich aholi yashaydigan hudud ustida uchishi xavfli bo‘lishi mumkinligidan xavotir bildirmoqdalar. Ularning fikricha, bu mashg‘ulot samolyoti bo‘lib, shahar ustida parvoz qilish xavfsizlik talablariga to‘g‘ri kelmasligi ehtimoldan holi emas.
Shu sababli, mas’ul idoralardan vaziyatga izoh berish va xavfsizlik choralarini kuchaytirish so‘ralmoqda.
