Davlat xavfsizlik xizmati xodimlari tomonidan firibgarlar ushlandi, deb xabar beradi matbuot xizmati. Bu haqida Upl.uz xabar berdi.
DXX va Bosh prokuratura departamenti xodimlari bilan hamkorlikda o‘tkazilgan maxsus tezkor tadbirda qurilish ob’ektlarini loyihalash bilan shug‘ullanuvchi mas’uliyati cheklangan jamiyatning ofis menejeri hamda 1990 yilda tug‘ilgan rieltor ushlangan. Ular oldindan 200 ming AQSh dollari miqdorida avans olgan.
Ma’lum bo‘lishicha, firibgarlar Mirzo Ulug‘bek tumanida joylashgan 50 sotix yer maydonini fuqaroga to‘rt million dollarga sotishni va’da qilgan. Shuningdek, 100 ming dollar evaziga kottej qurilishi uchun zarur hujjatlarni olish va yana 100 ming dollarni yer maydonini xaridor nomiga rasmiylashtirish uchun o‘zining yuqori lavozimli tanishlari orqali tashkil etishni va’da qilgan.
Biroq mazkur yer maydoni firibgarlarga tegishli emasligi aniqlangan. Ushbu holat yuzasidan O‘zbekiston Respublikasi Jinoyat kodeksining firibgarlik va pora berish moddalari bo‘yicha jinoyat ishi qo‘zg‘atilgan.
Ularga nisbatan o‘n yilgacha qamoq jazosi qo‘llanilishi mumkin. Hozirda ushlangan shaxslarning boshqa sheriklari aniqlanmoqda.
