Davlat xavfsizlik xizmatining matbuot xizmati hamda Migratsiya agentligi tomonidan rasmiy axborotlar e’lon qilindi. Bu haqida Upl.uz xabar berdi.
Namangan viloyatida Migratsiya agentligi xodimi 41 ming AQSh dollarini olgan vaqtida ushlangan. U Janubiy Koreyaga mehnatga yuborish evaziga pul olgan.
Shu bilan birga, uning jinoyat sherigi ham yana bir xodim ekanligi aniqlangan. Sherigi 15 ming dollarni olgan paytda qo‘lga olingan.
Ma’lum bo‘lishicha, 2024 yil davomida bu jinoyatchilar 80 nafar fuqaroning ishonchiga kirib, umumiy 700 ming dollardan ortiq pul olgan. Ular ishga yuborish va’dasini bajarmagan.
Ushbu holat yuzasidan O‘zbekiston Respublikasi Jinoyat kodeksining “Firibgarlik” hamda “Poraxo‘rlikka sheriklik qilish” moddalariga asosan jinoyat ishi ochilgan. Migratsiya agentligi bu holat yuzasidan izoh berib, ayrim xodimlarning noqonuniy harakatlari sababli Janubiy Koreyaga rasmiy yuborish bilan shug‘ullanuvchi mas’ul shaxslar tarkibi to‘liq yangilanganini ma’lum qildi.
Shuningdek, Seuldagi vakolatxonada ishlaydigan xodimlar tarkibida ham o‘zgarishlar kiritilgan. Agentlik bu kabi kasbiga sodiq bo‘lmagan, fuqarolarning ishonchidan suiiste’mol qilgan xodimlarning harakatlarini qat’iyan qoralaydi.
Bu holat davlat migratsiya tizimining obro‘siga putur yetkazgan. Shu bois, barcha mas’ul xodimlar faoliyati yanada shaffof va qonuniy bo‘lishi ta’minlanadi.
