Uchtepa tuman bo‘limiga ijro hujjati kelib tushdi. Bu haqida Upl.uz xabar berdi.
Hujjatda qarzdor B.T.dan uch nafar voyaga yetmagan farzandlarning parvarishi uchun B.G.ga aliment undirish belgilangan. Ushbu ijro varaqasi 2018 yil 17 may hamda 2022 yil 20 aprel sanalarida Uchtepa tumanlararo fuqarolik ishlari bo‘yicha sudining sud buyrug‘i asosida berilgan.
Hujjatlarga muvofiq, qarzdor har oy o‘z daromadining uchdan bir qismini farzandlar voyaga yetguniga qadar to‘lab borishi lozim. Tuman bo‘limi ijro ishini ochdi.
Ijro harakatlari davomida qarzdor bo‘limga murojaat qilib, uch farzandning voyaga yetguniga qadar avans tarzida to‘lanishi lozim bo‘lgan aliment summasini hisoblab berishni so‘radi. O‘zbekiston Respublikasi Oilalar kodeksining 145-moddasi hamda Vazirlar Mahkamasining 2018 yil 6 oktyabrdagi 808-sonli qaroriga muvofiq, Bosh ijro byurosining elektron dasturi yordamida 2025 yil 1 iyuldan 2040 yil 2 fevralgacha bo‘lgan davr uchun avans to‘lovi hisoblandi.
Umumiy summa 1 847 413 073 so‘mni tashkil etdi. Joriy yil 29 avgust kuni qarzdor aliment sifatida 150 000 dollar to‘lab, ijro ishini yakunladi.
Shu tariqa aliment to‘lovlari bo‘yicha barcha majburiyatlar bajarildi.
