Google корпорацияси Android операцион тизимида хавфсизлик сиёсатида муҳим ўзгаришларни эълон қилди. Bu haqida Upl.uz xabar berdi.
Бу ўзгаришлар Ўзбекистон фойдаланувчилари ва дастурчиларини бевосита қамраб олади. 2026 йилдан бошлаб, сертификатланган қурилмаларда барча ўрнатиладиган иловалар учун мажбурий тасдиқлаш тизими жорий этилади.
Бу эса текширилмаган манбалардан APK файлларни юклашни чеклайди. Бу ташаббус фойдаланувчиларни фирибгарлик схемалари ва зарарли дастурлардан ҳимоя қилишга қаратилган.
Ҳозирги вақтда ташқи интернет манбалари орқали ўрнатилган иловаларда зарарли кодлар расмий Google Play дўконидаги иловаларга нисбатан 50 баробар кўпроқ учрайди. Янги тизим ноқонуний дастурлар тарқалишини қийинлаштиради ва шахсий ҳамда молиявий маълумотларни ўғирлашга қарши қўшимча ҳимоя қатламини яратади.
Янги тизим босқичма-босқич жорий этилади. 2025 йил октябрь ойида дастурчилар учун илк чекланган кириш имконияти очилади, улар янги талаблар билан танишади.
2026 йил мартдан эса верификация жараёни барча дастур яратувчилари учун очиқ бўлади. Мажбурий текширув 2026 йил сентябрида Бразилия, Индонезия, Таиланд ва Сингапур каби мамлакатларда бошланади.
2027 йилга келиб ушбу талаб глобал бозорга, жумладан Ўзбекистонга ҳам татбиқ этилиши кутилмоқда. Янги тизимнинг асосий вазифаси ҳар бир илованинг мазмунини таҳлил қилиш эмас, балки унинг муаллифини аниқлашдир.
Бу жараён "паспорт текшируви"га ўхшатилган. Дастурчилар ўз шахсий маълумотлари — исм, манзил ва алоқа маълумотларини тақдим этиб, тасдиқлаши керак.
Ташкилотлар эса ўзларининг D-U-N-S рақамини кўрсатиши ва расмий веб-сайт эгалигини тасдиқлаши лозим. Бу тизим аноним таҳдидларни сезиларли даражада камайтиради.
Бу ўзгаришлар Ўзбекистон фуқароларининг киберхавфсизлигини таъминлашда муҳим қадам бўлади. APK файллар орқали яширин дастурлар ўрнатиш ва шахсий маълумотларни ўғирлаш ҳолатлари кўпайиб бораётгани сабабли, янги чоралар қўшимча ҳимояни таъминлайди.
Иловалар манбалари устидан назоратни кучайтириш кибержиноятчиликка қарши самарали курашишга ёрдам беради, фойдаланувчиларнинг шахсий ва молиявий маълумотларини ноқонуний киришдан ҳимоя қилади. Қонуний идоралар киберфирибгарликни аниқлаш ва олдини олишда операцион тизим даражасида технологик қўллаб-қувватлашга эга бўлади.
Android тизими дунёда энг кўп қўлланиладиган мобил операцион тизим бўлиб, 3 миллиарддан ортиқ фаол қурилмаларда ўрнатилган. Унинг очиқ манба коди дастурчилар ва фойдаланувчиларга кенг эркинлик берган бўлса-да, шу билан бирга хавфсизлик соҳасида қўшимча таҳдидларни ҳам келтириб чиқарган.
Янги сиёсат эса ушбу хавфсизлик муаммоларини бартараф этишга қаратилган.
