Xanchjou sudi xodimlarni sun’iy intellekt sabab ishdan bo‘shatishni taqiqladi
Xitoyning Xanchjou shahri sudi ish beruvchi kompaniyalarga o‘z xodimlarini faqatgina ularning vazifasini sun’iy intellekt texnologiyalari bajara olishi vaji bilan ishdan bo‘shatishni taqiqlovchi muhim qaror qabul qildi. Bu haqda Zamin.uz xabar berdi.
Mahalliy nashrlarning xabar berishicha, ushbu sud amaliyoti zamonaviy texnologiyalar davrida inson mehnat huquqlarini himoya qilish yo‘lidagi muhim qadam bo‘ldi. Mazkur ish tafsilotlariga ko‘ra, Chjou ismli fuqaro onlayn xizmatlar ko‘rsatuvchi korxonada sun’iy intellekt tomonidan beriladigan javoblar sifatini nazorat qilish bo‘limida faoliyat yuritgan.
Uning oylik ish haqi yigirma besh ming yuanni tashkil qilgan. Biroq vaqt o‘tishi bilan ish beruvchi texnologik imkoniyatlar kengaygani va jarayonlar to‘liq avtomatlashganini ro‘kach qilib, ushbu lavozimga ehtiyoj qolmaganini ma’lum qilgan.
Kompaniya rahbariyati xodimga avvalgi maoshidan ancha kam, ya’ni o‘n besh ming yuan to‘lanadigan boshqa vazifaga o‘tishni taklif etgan. Chjou daromadining keskin kamayishi sababli ushbu taklifni rad etganidan so‘ng, korxona u bilan tuzilgan mehnat shartnomasini bir tomonlama bekor qilgan.
Xodim o‘z huquqlarini tiklash maqsadida sudga murojaat qilgan. Sud barcha holatlarni o‘rganib chiqib, ishdan bo‘shatish jarayonini noqonuniy deb topdi.
Sud qarorida qayd etilishicha, biznes jarayonlarining sun’iy intellekt tizimlariga o‘tkazilishi amaldagi mehnat shartnomasini bajarib bo‘lmaydigan holat sifatida baholanishiga asos bo‘la olmaydi. Shuningdek, xodimga daromadi sezilarli darajada kam bo‘lgan boshqa ish o‘rnini taklif qilish adolatli o‘tkazma hisoblanmasligi ta’kidlandi.
Yakuniy xulosaga ko‘ra, kompaniyalar ishlab chiqarishga yangi texnologiyalarni joriy etish huquqiga ega bo‘lsa-da, bu jarayonda xodimlarning qonuniy manfaatlarini poymol etmasliklari shart. Ta’kidlash joizki, avvalroq Pekin shahrida ham shunga o‘xshash nizoli vaziyat yuzaga kelgan va sud xodimning foydasiga qaror chiqarib, ish beruvchining harakatlarini asossiz deb topgan edi.
