Toshkent viloyatida yangi xalqaro aeroport qurilishi uchun 1300 gektardan ortiq yer maydoni ajratildi. Bu haqida Upl.uz xabar berdi.
Hududiy kadastr boshqarmasining ma’lumotlariga ko‘ra, aeroport qurilishi uchun mo‘ljallangan yerlar Urta Chirchiq va Quyi Chirchiq tumanlarida joylashgan. Umumiy maydonning asosiy qismi, ya’ni taxminan 1070 gektar sug‘oriladigan yerlar hisoblanadi.
Bu esa ularning kelajakdagi foydalanishiga oid savollarni tug‘dirishi mumkin. Shuningdek, loyiha doirasida 112 gektardan ortiq bog‘lar va 121 gektarga yaqin boshqa turdagi yer maydonlari ham o‘z ichiga olindi.
Eng ko‘p yer maydoni Urta Chirchiq tumani tomonidan taqdim etiladi, u yerda 790,76 gektar yer ajratilgan bo‘lib, shundan 600 gektardan ortig‘i sug‘oriladigan yerlardir. Quyi Chirchiq tumanida esa qurilish uchun 519 gektar yer ajratilgan bo‘lib, ularning katta qismi, ya’ni 465,5 gektari sug‘oriladigan yer hisoblanadi.
Yangi aeroport mavjud aeroportning yukini kamaytirish va Markaziy Osiyoda muhim aviatsiya markaziga aylanishi kutilmoqda. Qurilish jarayoni nafaqat aviatsiya aloqalarini yaxshilashga, balki ko‘plab yangi ish o‘rinlari yaratishga va hudud iqtisodiyotining rivojlanishiga xizmat qiladi.
